Ўзбекистон Республикаси Президентининг 2023 йил 11 март кунги “Кекса авлод вакилларини ҳар томонлама қўллаб-қувватлаш ҳамда уларнинг ижтимоий фаоллигини оширишга доир қўшимча чора-тадбирлар тўғрисида”ги 92-сонли қарори” ижросини таъминлаш мақсадида бугун, 22 июль куни Ромитан тумани ҳокимлигининг катта мажлислар залида туман ҳокимлиги, Нуронийлар жамғармаси туман бўлими, Оила ва хотин-қизлар бўлими ҳамда Ёшлар ишлари агентлиги бўлими ҳамкорлигида «Бир нуроний – ўн нафар ёшга масъул» кўрик танловининг туман босқичи бўлиб ўтди.
Танловда туман ҳокими ўринбосарлари Ф.Саломов, З.Аслонова, Нуронийлар жамғармаси туман бўлими раиси О.Жумаев, Халқ депутатлари туман Кенгаши депутати Ш.Тойиров, Ёшлар ишлари агентлиги бўлими бошлиғи З.Қурбонов, МФЙ раислари, уларнинг кексалар масалалари бўйича маслаҳатчилари, маҳаллалардаги хотин-қизлар фаоллари, таклиф этилган туман ташкилотларининг вакиллари ҳамда кенг жамоатчилик иштирок этишди.
Танловда “Зарафшон”, “Истиқлол”, “Афросиёб”, “Қалайчорбоғ”, “Азизон”, “Урганжиён”, “Қўрғон” ва “Чандир” маҳаллаларидан иштирок этган тажрибали, нуронийлар ўзларига бириктирилган ёшлар билан ишлаш жараёнлари, орттирилган тажрибалари, муаммоларнинг ечимлари тўғрисида фикр-мулоҳазаларини билдиришди ҳамда амалга ошираётган ишлари ҳақида сўзлаб беришди.
Танлов низоми асосида 3 та шарт бўйича беллашган Кексалар маслаҳати гуруҳи раисларидан қуйида номлари кўрсатилганлар мусобақа шартлари асосида фаол иштирок этиб, диплом ва пул мукофотлари билан тақдирландилар.
Танлов якуни бўйича фахрли 1-ўринга “Қалайчорбоғ” МФЙ кексалар маслаҳати гуруҳи раиси Шокир Ҳафизов лойиқ топилиб, 1-даражали диплом ва базовий ҳисоблаш миқдорининг 7 баравари миқдорида пул мукофоти, 2-ўринга “Афросиёб” МФЙ кексалар маслаҳати гуруҳи раиси Дилдор Жумаева лойиқ топилиб, 2-даражали диплом ва базовий ҳисоблаш миқдорининг 5 баравари миқдорида пул мукофоти, 3-ўринга “Урганжиён” МФЙ кексалар маслахат гурухи раиси Темир Қосимов лойиқ топилиб, 3-даражали диплом ва базовий хисоблаш миқдорининг 3 баравари миқдорида пул мукофоти билан тақдирланишди.
