Ромитан тумани марказидан анча узоқда жойлашган қишлоқларда ҳам ихчам ва қулай тиббиёт масканлари очилиши давом этмоқда.
Аҳолига тиббий хизматни юксалтириш мақсадида бугун, 7 июль куни Ромитан туманининг 4-секторга қарашли “Пойжўй” маҳалла фуқаролар йиғинида “Маҳалла тиббиёт пунктининг” очилиш маросими бўлиб ўтди.
Шу муносабат билан ўтказилган маросимда туман ҳокими Умеджон Барноев бошчилигида сектор раҳбарлари, туман ҳокими ўринбосарлари, туман Тиббиёт бирлашмаси масъуллари, шифокорлар, кенг жамоатчилик вакиллари, нуронийлар, маҳалла фаоллари ҳамда оммавий ахборот воситвлари вакиллари иштирок этди.
Тадбирда туман ҳокими Умеджон Барноев сўзга чиқиб, мамлакатимизда давлатимиз раҳбари бошчилигида соғлиқни сақлаш соҳасида олиб борилаётган ерни кўламли ислоҳотлар ҳақида сўз юритиб, маҳалла аҳлини янги бинонинг фаолият бошлаши муносабати билан муборакбод этди ҳамда бу ерда фаолият олиб бораётган саломатлик посбонларининг келгуси ишларига эса муваффақиятлар тилади.
Маросимга йиғилганлар мамлакатимиздаги тинчлик-осойишталик, тўкин-сочинлик ва фаровонлик учун Яратганга шукроналар келтирдилар. Шундан сўнг маҳалла аҳли бир пиёла чойга таклиф этилди.
Ушбу тиббиёт шаҳобчалари (контейнер)нинг фойдаланишга топширилиши аҳолининг узоғини яқин қилди. Эндиликда тиббий ускуналар, дори-дармонлар, замонавий алоқа воситалари билан жиҳозланган тиббий пунктлар қишлоқ аҳолиси учун хизмат кўрсатади.
Тиббиёт пунктларида электр, сув, канализация тармоқлари улаб берилган, қишда иссиқ, ёзда салқинлиги учун ҳам ҳеч қандай муаммоларга ўрин йўқ. Аҳолига сифатли тиббий хизмат кўрсатиш учун зарур барча шароитлар яратилди.
