Маҳкумга тиббий ёрдам кўрсатиш ўрнига у бошқа маҳкум томонидан калтакланган камерага жойлаштирилган.
Иш материалларига кўра, ўтган йилнинг 19 март куни Андижон вилоятининг Шаҳрихон туманида яшовчи 32 ёшли С.М. Ички ишлар вазирлиги тергов изоляторига олиб келинган. Аввалроқ суд унинг ахлоқ тузатиш ишлари тарзидаги жазосини озодликдан маҳрум қилиш билан алмаштирган эди. Бу ҳақда UzNews.uz’га Олий суд матбуот хизмати хабар берди.
Маълум бўлишича, тергов изоляторида маҳкум 12 нафар ички ишлар органлари ходимлари томонидан қийноққа солинган ва калтакланган.
Маҳкумга тиббий ёрдам кўрсатиш ўрнига, тергов изоляторининг 32-камерасига жойлаштирилиб, у ерда бошқа маҳкум Ж.У. билан жанжаллашган, натижада у яна калтакланган ва турли даражадаги жиддий тан жароҳатлари етказилган. Тахминан 3 соатдан кейин С.М. вафот этган.
Иш материалларида қайд этилганидек, 12 нафар ходим томонидан калтакланган М.ни камерага ётқизишдан олдин тергов изоляторининг даволаш-профилактика бўлими бошлиғи Т.А. ва бўлим психиатри Ш.А. маълум бўлишича, шифокорлар унинг аҳволи қониқарли, ташқи зарари йўқ, деб ёлғон қайдлар тузган. Шу билан бирга, маҳкумда ёпиқ бош мия жароҳати, бош мия контузияси, миянинг юмшоқ ва қаттиқ пардалари остидан қон қуйилиши, мия шиши борлиги аниқланган.
Судда гумонланувчиларнинг айби исботланиб, уларга ҳукм ўқиб эшиттирилди.
Қуйидаги мансабдор шахсларга 4 йил муддатга озодликдан маҳрум қилиш жазоси тайинланди:
– ИИВ ЖИЭ 3-сонли тергов изолятори бошлиғининг ёрдамчиси – смена бошлиғи У.А.;
– 3-сонли тергов изоляторининг тартибни таъминлаш бўлими катта инспектори Ж.Р;
– корпус бошлиғи Э.Р.;
– тартибни таъминлаш бўлими катта назоратчиси М.Ж.;
– тартибни таъминлаш бўлими катта назоратчиси С.И.;
– тартибни таъминлаш бўлими катта назоратчиси М. М.
Қуйидаги мансабдор шахслар ҳам жиноят содир этишда айбдор деб топилиб, суд қарори билан 3 йил муддатга озодликдан маҳрум этилди:
– тергов изоляторининг бошлиғи Г.Г.;
– тартибни таъминлаш бошқармаси корпус бошлиғи З.Ш.;
– тезкор-қидирув бошқармаси катта тезкор ходими И.И.;
– тартибни таъминлаш бўлими назоратчиси Д.М.;
– даволаш-профилактика бўлими мудири А.Т.
Даволаш-профилактика бўлими психиатри Ш.А.га 3 йил муддатга озодликдан маҳрум қилиш жазоси тайинланди.
Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланди.
Маҳкумнинг ўлимида суд томонидан айбдор деб топилган 12 нафар ИИО ходимидан 10 нафари ички ишлар органларида бир ярим йил, 2 нафари эса бир йил муддатга ички ишлар органларида ишлаш ҳуқуқидан маҳрум этилди.
