Ромитан тумани “Афросиёб” маҳалла фуқаролар йиғини “Шифокорлар” кўчасида “IMKON TREYD CENTR” масъулияти чекланган жамиятининг 31 филиали – қарийб 5 минг хилдан ортиқ мебель маҳсулотлари ва уй-рўзғор буюмлари, энг замонавий маиший техникалар билан савдо хизматини кўрсатувчи “ИМКОН” савдо маркази иш бошлади.
Шу муносабат билан ўтказилган маросимда сектор раҳбарлари, туман ҳокими ўринбосарлари, тегишли ташкилот, корхона вакиллари, тадбиркорлар, меҳнат фахрийлари ва ёшлар иштирок этди.
Тадбирда Ромитан туман ҳокими Умеджон Барноев ҳам иштирок этиб, Мамлакатимизда муҳтарам юртбошимиз томонидан кичик бизнес ва хусусий тадбиркорликни янада ривожлантириш, соҳа субъектлари фаолиятини ҳар томонлама қўллаб-қувватлашга кенг эътибор қаратилаётгани, мазкур ислоҳотлар ҳудудларда, хусусан туманимизда ҳам ҳусусий тадбиркорликнинг кенг ривожланиши, аҳоли турмуш фаровонлигини тобора юксалаётгани билан ўз аксини топаётгани таъкидланди.
Кўркам ва замонавий қиёфага эга савдо марказида харидорлар учун барча қулайликлар яратилган. Расталардаги 2 минг турдан ортиқ сифатли маҳсулотлари савдоси нафақат нақд пул, балки пластик карточкалар ҳамда кредит асосида амалга оширилмоқда. Шунингдек, дастлабки кунларда турли акциялар ва имтиёзли чегирмалар амалга оширилаётганидан барча мамнун.
– Савдо марказини ишга тушириш орқали 20 нафардан ортиқ туман ёшларини доимий иш билан таъминлашга эришдик. Фаолиятимизни кенгайтириш орқали мазкур рақамни тез фурсатда янада оширишни режалаштирганмиз, – дейди “ИМКОН” савдо маркази раҳбари Д.Муродов. – Барча маҳсулотларимиз сифатли ва кафолатга эга. Ўз сервис хизматимиз ҳам мавжуд. Халқимизга сифатли хизмат кўрсатиш, уларнинг маиший шароитларини янада яхшиланиши йўлида оз бўлса-да ҳиссамиз тегишидан мамнунмиз.
Очилиш маросими, айниқса марказга ташриф буюрган туман аҳли учун ўзгача шодиёна ва қувончли тадбирга айланиб кетди. Эстрада гуруҳлари, таниқли бошловчилар ўз чиқишлари билан барчага аъло кайфият улашишди.
Шунингдек, қизиқарли савол-жавоблар, кўнгилочар дастурлар ташкил этилиб, каттаю-кичикларга, мунис онахонларга савдо марказининг эсдалик совғалари топширилди.
