Инсоният тарихига назар солсак, қанчадан қанча оғир кунлар, қонли урушлар, йўқотишларни бошидан кечирган. Мана орадан салкам бир аср ўтган бўлса ҳам, жаҳон урушларининг гувоҳи бўлган инсонлар оз бўлсада ҳали ҳаётлар. Бу фахрий инсонлар чинакамига биз ёшлар учун ибрат мактабини ўташмоқда.
Бухоро давлат университети Волонтёрлик маркази аъзолари Бухоро вилоятида истиқомат қилаётган Иккинчи жаҳон уруши қатнашчилари – Аҳмад Мухсинов, Катизе Менсеитова ҳамда Норбегим Рамазоновалар хонадонида бўлиб, уларни байрам билан табриклашди.
Иккинчи жаҳон уруши қатнашчилари уруш хотиралари, очарчилик даврлари, ҳаёт тажрибалари ҳақида сўзлаб, бугунги кунларнинг қадрига етиб, шукрона келтириш кераклигини таъкидладилар.
“Сизларга узоқ умр, сиҳат-саломатлик тилаймиз! Сизлар бор экансиз, биз шундай тинч ватанда таълим оляпмиз. Бунинг учун сизларга ўз миннатдорчилигимизни билдирамиз. Дуоларингизни олиш биз ёшларга ўзгача куч беради”, – дейди университет волонтёрлари.
Қайсики юртда кексалар, фахрийлар қадрланар ва эъзозланар экан, ўша юртнинг ёшлари келажакка ишонч ва умид билан улғаяди. Зеро, инсон қадри – улуғ, хотираси – муқаддас!
