Солиқ қарзи учун “Lacetti” автомашинаси сотилиши мумкин

Юртимизда тадбиркорларни қўллаб-қувватлаш, уларнинг ҳуқуқ ва манфаатларини ҳимоя қилишга алоҳида эътибор қаратилмоқда.
Айниқса, сўнгги йилларда қабул қилинган қонунлар ва Президент фармонлари соҳада таркибий ўзгаришлар, хусусий мулк, кичик бизнес ва хусусий тадбиркорликни жадал ривожлантириш, қулай ишбилармонлик муҳитини яратиш учун кенг йўл очиб берилди.
Тадбиркорларга солиқлар бўйича бир қатор имтиёзлар берилди. Бироқ, солиқларни ўз вақтида тўламаслик ҳолатлари ҳамон учраб турибди.
           Жумладан, Бухоро вилояти давлат солиқ бошқармасининг 19.12.2022 йилдаги қарорига асосан солиқ тўловчи “SEEYAR” МЧЖ 15.11.2022 йил ҳолатида 352 млн. 439 минг сўм солиқ қарзини тўламаганлиги учун Солиқ кодексининг 115-119-моддаларига кўра қарздорга талабнома юборилган.
 Лекин, 10 календарь куни ичида қарздорлик бартараф этилмаган ва қарздорлик бўйича ҳеч қандай эътироз ҳам келиб тушмаган.
Мазкур қарорнинг ижросини таъминлаш мақсадида Мажбурий ижро бюроси Шофиркон туман бўлими иш юритувига юборилган.
Бўлим давлат ижрочиси томонидан шу куни ижро иши юритишни қўзғатиш тўғрисида қарор қабул қилиниб, қарор нусхаси тарафларга юборилган ҳамда қарздорликни бартараф этиш учун қарздорга ихтиёрий муддат берилган.
Ижро ҳаракатлари давомида қарздорнинг мулкий аҳволи ўрганилиб, унинг номида “Lacetti” русумли автотранспорт воситаси мавжудлиги аниқланган.
“Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 42-моддасига асосан автотранспорт воситасига нисбатан қидирув эълон қилиниб, қидирув ҳаракатлари киришилган.
 Бюронинг қидирув ходимлари томонидан жорий йилнинг 28 апрель куни олиб борилган қидирув тадбирлари натижасида қарздор МЧЖга тегишли “Lacetti” автомашинаси Бухоро шаҳри ҳудудида аниқланган.
 Мазкур автомашина тегишли тартибда хатланиб, вақтинча сақлаш учун жарима майдончасига жойлаштирилган ҳамда қарздорлик бартараф этилмаган тақдирда, мазкур автомашина баҳоланиб, “E-auksion” электрон электрон савдо майдончаси орқали савдога чиқарилиши ҳақида қарздор расман огоҳлантирилган.
Ҳозирда, ижро ҳаракатлари давом эттирилмоқда.
Бюронинг Бухоро вилояти бошқармаси