Корхонага тегишли “Jentra” автомашинаси хатланди

Суд ёки бошқа ваколатли органларнинг қонуний кучга кирган ҳужжатлари давлат ижрочисининг ижро ҳаракатларини бошлаш ва ижро процессига киришиш учун қонуний асос ҳисобланади.
Иш юритувидаги суд ҳужжатлари ижросини таъминлаш назоратга олинган ва бу борада муайян ишлар қилинмоқда.
           Масалан, Когон туманлараро иқтисодий судининг 19.08.2022 йилдаги ижро ҳужжатига асосан ундирувчи “DD General Insurance” МЧЖ фойдасига регресс тартибида қарздор “Sardor Meva Sabzavot tayyorlov Savdo” МЧЖдан жами 621.271.600 сўм ундириш тўғрисидаги ижро ҳужжати Бюронинг Когон тумани бўлими иш юритувига келиб тушган.
Давлат ижрочиси томонидан шу куни ижро иши юритишни қўзғатиш тўғрисида қарор қабул қилиниб, қарор нусхаси тарафларга юборилган.
Қарздорликни бартараф қилиш учун қарздорга ихтиёрий муддат берилган бўлсада, ижро ҳужжати талаблари бажарилмаган.
Ижро ҳаракатлари давомида қарздорнинг мулкий аҳволи ўрганилиб, номида “Jentra” русумли автотранспорт воситаси мавжудлиги аниқланган.
“Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 42-моддасига асосан автотранспорт воситасига нисбатан қидирув эълон қилиниб, қидирув ҳаракатлари олиб борилган.
 Бюронинг қидирув ходимлари томонидан жорий йилнинг 18 апрель куни олиб борилган қидирув тадбирлари натижасида қарздор МЧЖга тегишли “Jentra” автомашинаси Бухоро шаҳри ҳудудида аниқланган.
 Мазкур автомашина тегишли тартибда хатланиб, вақтинча сақлаш учун жарима майдончасига жойлаштирилган ҳамда қарздорлик бартараф қилинмаган тақдирда, мазкур автотранспорт воситаси электрон савдо майдончаси орқали савдога чиқарилиши ҳақида расман огоҳлантирилган.
Ҳозирда, ижро ҳаракатлари давом эттирилмоқда.
Бюронинг Бухоро вилояти бошқармаси