Қидирувдаги “Lacetti” автомашинаси топилди

Тижорат банклари томондан турли хил шартлар асосида аҳолига кредитлар ажратилиши йўлга қўйилган.
Бироқ, шартнома шартлари бузилганлиги боис банк кредит фоиз қарзи ва ажратилган кредитни муддатидан олдин тўлиқ ундириш бўйича судга даъво аризаси киритиши мумкин.
Шартнома шартларига риоя қилмаслик мижозга қўшимча ҳаражат, ташвиш ва муаммолар олиб келиши мумкин. 
           Масалан, фуқаролик ишлари бўйича Бухоро туманлараро судининг 13.09.2022 йилдаги ижро ҳужжатига асосан ундирувчи АТ “Асака банк” Бухоро вилоят филиали фойдасига қарздорлар “Buxara agro frurt” ва “Gold Drop” МЧЖлардан солидар тартибда 480.531.871 сўм муддати ўтган фоиз қарздорлиги ундириш тўғрисидаги ижро ҳужжати Бюронинг Бухоро туман бўлими иш юритувига келиб тушган.
Бўлим давлат ижрочиси томонидан шу куни ижро иши юритишни қўзғатиш тўғрисида қарор қабул қилиниб, қарор нусхаси тарафларга юборилган.
Ихтиёрий муддат давомида қарздорлик бартараф қилинмаганлиги сабабли, давлат ижрочисининг қарорига асосан қарздорларнинг бирига тегишли бўлган “Lacetti” русумли автотранспорт воситасига нисбатан “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 42-моддасига асосан қидирув эълон қилинган.
 Бюронинг қидирув ходимлари томонидан жорий йилнинг 7 апрель куни олиб борилган тезкор-қидирув тадбирлари давомида қарздорга тегишли қидирувдаги “Lacetti” автомашинаси Бухоро шаҳар ҳудудида аниқланиб, тегишли хатланган ва жарима майдончасига жойлаштирилган.
Қарздорлик белгиланган муддат давомида бартараф қилинмаган тақдирда, мазкур автомашина баҳоланиб, “E-auksion” электрон савдо майдончаси орқали савдога чиқарилиши ҳақида қарздор огоҳлантирилди.
Бюронинг Бухоро вилояти бошқармаси