Пиёдалар ер ости ўтиш йўли бугун, 20 март куни фойдаланишга топширилди.
Халқаро аҳамиятга эга бўлган “Самарқанд-Бухоро-Туркманбоши” автомобиль йўлининг 272-километрида тиббиёт шаҳарчаси, “Карвон” буюм бозори ҳамда бош бекатлар борлиги ҳисобидан пиёдалар оқимининг жуда ҳам серқатновлиги мавжудлиги, қолаверса, аҳолининг талаб ва истаклари инобатга олинган ҳолда бу ерда пиёдалар ер ости ўтиш йўли қурилаётгани ҳақида хабар берган эдик.
— Кўпчилик яхши билади. Бухоро вилояти тупроғидаги инжиқлик сабаб шаҳар ҳудудида мавжуд ерости йўллари зах сувларига тўлиб, намланиб, чўкиши оқибатида улар кўмилиб, фаолияти тўхтатиб қўйилган. Аммо автомобиллар сонининг кескин суръатда кўпайиб бораётгани боис одамлар хавфсизлигини таъминлаш учун еростидан ўтиш йўлларини тиклаш зарурати туғилди. Албатта, мазкур ер ости йўлини қуришда тупроқдаги захлик ва юқори даражадаги намлик таъсирини йўқотишга катта эътибор қаратдик. Бунда тажрибада синовдан ўтган усуллар фойдаланилди. Шунингдек, ер ости йўли қурилиши жараёнида дренаж тармоқлари ўрнатилди. Қисқа айтганда, ҳеч қандай зах ер остидан ўтиш йўлига таъсир кўрсата олмайди, – дейди вилоят Автомобиль йўллари ҳудудий бошқармаси бошлиғи Мурод Бердиев.
Узунлиги 32 метр, кенглиги 4,5 метр, баландлиги 2,5 метрдан иборат бўлган, қурилиши “Бухоро йўллардан мунтазам фойдаланиш” унитар корхонаси томонидан амалга оширилган пиёдалар ер ости ўтиш йўли бугун, 20 март куни фойдаланишга топширилди.
Шу муносабат билан ташкил этилган тадбирда вилоят ҳокими Ботир Зарипов, секторлар раҳбарлари, кенг жамоатчилик ва оммавий ахборот воситалари ходимлари қатнашди.
— Биз турган жой шаҳардаги энг тирбанд йўллардан бири ҳисобланади. Ер ости йўли қурилиши натижасида бу ердаги тирбандлик бартараф этилди, йўл-транспорт ҳодисаларининг олди олиниб, пиёдаларнинг хавфсиз ҳаракатланиши таъминланди. Фуқароларимизнинг таклифларини инобатга олиб, марказий кўчалар ва магистрал йўлларда ҳаракат тезлиги ўрганилган ҳолда бошқа ҳудудларнинг серқатнов йўлларида шу каби ер ости ўтиш жойларини қурамиз. Бу ҳам одамларимизга бир енгиллик, – деди вилоят раҳбари.
