Ассалому алайкум мунис ва муҳтарама онахонлар!
Қадрли опа-сингиллар ва дилбар қизлар!
Барчамиз орзиқиб кутган сўлим баҳор кириб келиши билан табиат очилиб, кўнгилларимиз ёруғ туйғуларга тўлиб бораётган мана шу шукуҳли айёмда Сиз, азизларимни, Сизлар орқали бутун туманимиздаги хотин-қизларни “8 март – Халқаро хотин-қизлар куни” муносабати билан самимий муборакбод этаман.
Биз бугун Яратганнинг буюк мўъжизаси бўлган, ҳаёт давомийлиги ва абадийлигини ўзида мужассам этган аёл зотини, табаррук оналарни улуғлар эканмиз, беихтиёр мутафаккир бобомиз Алишер Навоийнинг “Жаннат оналарнинг оёғи остидадир” деган мазмундаги ҳикматли сўзларини эслаймиз ва муқаддас Она сиймоси олдида таъзим қиламиз. Одатда, аёлларни гулга қиёслашади. Чунки улар гўзаллик, нафосат ва меҳр-муҳаббат рамзи.
Ҳеч кимга сир эмас, аёл зоти ҳақида, унинг қандай тенгсиз латофат ва нафосат соҳибаси экани, эзгулик ва фидойилик рамзи, хонадонларимизнинг файзу фариштаси экани ҳақида тарихимизда не-не улуғ мутафаккирлар, шоир ва алломалар қанча-қанча дил сўзларини баён этганлар.
Юртимизда хотин-қизларни асраб-авайлаш, ҳурмат-эҳтиром кўрсатиш, уларни ижтимоий-ҳуқуқий жиҳатдан қўллаб-қувватлаш, сиёсий фаоллигини ошириш, касбий, жисмоний, маънавий, интеллектуал салоҳиятини юзага чиқариш ҳамда оналик ва болаликни муҳофаза қилиш масалаларига давлат сиёсати даражасида доимий эътибор қаратиб келинмоқда.
Аёл гўзал бўлса — олам гўзал, аёл бахтли бўлса — оила, бутун жамият бахтли бўлади, деган фикр бизнинг ҳаётий фалсафамизга айланаётганини ҳар томонлама англаб етмоқдамиз.
Қадрли ва азиз опа-сингиллар!
Сизларни ўзингиз каби чиройли ва дилбар байрамингиз билан яна бир бор табриклар эканман, барчангизга сиҳат-саломатлик, бахту саодат, хонадонларингизга файзу барака тилайман. Фарзандларингиз ва яқинларингиз бахтига, элу юртимиз бахтига ҳамиша омон бўлинглар.
