Бугун, Австриянинг Кремс амалий фанлар университетининг бош ижрочи директори Карл Энсфелнер, президенти Маг Боер Хейнс Бухоро давлат университетига ташриф буюрди. Меҳмонларни БухДУ ректори Обиджон Хамидов кутиб олиб, кичик мажлислар залида университет фаол талабалари ҳамда профессор-ўқитувчилар иштирокида икки университет ўртасида ҳамкорлик шартномасини имзолади.
Эндиликда Бухоро давлат университети Кремс амалий фанлар университети билан ИМC-трансмиллий дастурларни ишлаб чиқиш ва амалга ошириш, талабалар алмашинувини ташкил этиш ва амалга ошириш, ҳамкорликдаги тадқиқот лойиҳаларини ишлаб чиқиш, илмий ва педагогик кадрлар алмашинуви, нашрлар ва умумий манфаатли бошқа материаллар алмашинуви бўйича ҳамкорликни амалга оширади.
Шунингдек, ташриф доирасида меҳмонлар Франциянинг Вател меҳмонхона ва туризм бизнес олийгоҳи билан ташкил этилган қўшма таълим дастури фаолияти, Япон маркази фаолияти билан яқиндан танишдилар. Учрашув сўнгида меҳмонларга эсталик учун совғалар топширилди.
Маълумот ўрнида айтиш керакки, ИМC Университй Кремс Австриядаги энг нуфузли олий ўқув юртларидан бири саналиб, 1994 йилда хусусий халқаро бизнес мактаби сифатида ташкил этилган. 2002 йилда Австрия ҳукумати томонидан расман Австрия амалий фанлар университети номини олган. Битирувчиларнинг иш билан бандлик даражаси 98 фоизни ташкил этади. Университетда 27 соҳага йўналтирилган 3 та институт (бизнес бошқаруви, соғлиқни сақлаш ва биотехнология) фаолият олиб боради.
