Травматология ва ортопедия соҳасида вилоятда кўзга кўринган врач мутахассислардан бири, тиббиёт фанлари номзоди, олий тоифали шифокор, вилоят ҳокимлиги Соғлиқни сақлаш бошқармаси бош травматологи Маҳмуд Сафаров бошчилигидаги мутахассислар куни кеча Шофиркон тумани Тиббиёт бирлашмасида чаноқ-сон бўғими дисплазияси туркумига мансуб мураккаб жарроҳлик амалиётини муваффақиятли ўтказдилар.Шу турдаги жарроҳлик амалиётини бошидан кечирган беморларга келсак, «Қалмақон» МФЙ да яшовчи, 1969 йилда туғилган Файзулло Тошев ҳамда «Шодлик» МФЙ да истиқомат қилаётган, 1981 йилда туғилган Нурали Ҳамроевлар бир неча йилдирки, таянч ҳаракат аъзолари фаолияти чекланганидан, кучли оғриқ ва ҳолсизликдан шикоят қилиб келишган. Ҳатто туман ҳокимлигига мурожаат қилишиб, мураккаб жарроҳлик амалиёти учун моддий ёрдамга муҳтожликларини билдиришган.
Беморлар аҳволи қониқарли ва тез кунда уйларига рухсат берилади, дейди Шофиркон тумани Тиббиёт бирлашмаси бош врачи Самандар Хўжамқулов. Маҳалладаги оилавий шифокорлик пунктлари назоратида улар оёққа туришларига ишонч бор. Аҳамиятли жиҳати, бундай жарроҳлик амалиёти туманда биринчи бор ўтказилаётганига қарамасдан, муваффақиятли кечди ва жорий йилда худди шундай операцияни 50 нафарга яқин беморда ўтказиш кўзда тутилмоқда.
Қолаверса, туман ҳокимлиги амалий ёрдами билан 10 нафар худди шу тоифадаги бемор учун жарроҳлик амалиётини ўтказиш харажатига 300 миллион сўм маблағ молиялаштирилгани кам таъминланган ва моддий таъминотга муҳтож бемор оилаларига кўрсатилган ғамхўрлик бўлди. Юқоридаги икки жарроҳлик амалиёти ҳам ана шу хайр–саховат туфайлидир.
