Сир эмас, соғлиқни сақлаш тизимида бирламчи тиббий-санитария ёрдамини кўрсатиш, касалликларни профилактика қилиш ва эрта аниқлаш ҳозирги кундаги энг долзарб масала бўлиб қолмоқда. Айнан шу масалани ечишга кўмаклашиш, жойларда кўрсатилаётган бирламчи тиббий хизмат сифатини яхшилаш мақсадида вилоят хокимлиги соғлиқни сақлаш бошқармаси томонидан республика шошилинч тез тиббий ёрдам илмий маркази вилоят филиали, Бухоро Давлат тиббиёт институтининг юқори малакали мутахассислари иштирокида Вобкент туманида чуқурлаштирилган тиббий кўрик ўтказилмоқда.
Тиббий кўрик ўтказиш билан бирга, ҳозирги вақтда кенг тарқалган ўпка касалликлари, диабет, онкологик, юрак-қон томир касалликларининг олдини олиш, профилактика қилиш ва даволаш усуллари, соғлом турмуш тарзи ва фаол жисмоний ҳаракатнинг инсон саломатлигига ҳиссаси тушунтирилмоқда.
Шунингдек, тиббий кўрик дастуридан Россия давлатидан келган етакчи жарроҳлар томонидан буйрак кўчириш амалиёти ўтказилиши ўрин олган. Операция жараёнини Бухоро давлат тиббиёт институти талабалари тўғридан-тўғри видеоконференция орқали кузатиш имконияти яратилган.
Бу ўз навбатида сифатли таълимни ташкил этиш, талабаларнинг билим ва тажрибаларини бойитиш, амалий кўникмаларини оширишга хизмат қилиши билан аҳамиятлидир. Жараёнлар давом этмоқда. Бу ҳақда батафсил ахборот берилади.
