Маълумки, ижтимоий тармоқларда бухоролик фуқаролар шаҳардаги туризм мажмуаси қурилишидан норози бўлиб давлатимиз раҳбарига мурожаат йўллади.
Қурилиш ва уй-жой коммунал хўжалиги вазирлиги матбуот хизматининг ЎзАга маълум қилишича, вазир Ботир Зокиров айни вақтда Бухоро шаҳрига йўл олди. У ерда фуқаролар билан учрашиб, жараённи ўрганмоқда.
Қурилиш ва уй-жой коммунал хўжалиги вазири Ботир Зокиров Бухородаги ҳолат юзасидан қуйидагиларни маълум қилди.
- Марказнинг лойиҳа таклифи бўлгач, жамоатчиликка муҳокама учун қўйилади. Бухоро шаҳрида аҳоли учун алоҳида тақдимот қилиб берилади. Айни вақтда ўрганиш ишлари олиб борилмоқда, холос. Бу дегани эртадан бузилиш бошланади, дегани эмас, ҳали охирги нуқта қўйилганича йўқ. Лойиҳани ҳали ЮНЕСКО билан келишиш босқичи бор.
Ҳозир марказ тушадиган жойда хатлов ишлари олиб борилмоқда. Яъни тартибга кўра, у ерда қанча бино бор, кимга тегишли экани ҳақида маълумот йиғилади. Агар марказ ўрнида жойлашган бино ва иншоотлар бузиладиган ёки бошқа жойга кўчириладиган бўлса, лойиҳа танловида ютган тадбиркорлик субъекти томонидан ўрнига ўрин қуриб бериш ёки ўрнатилган тартибда компенсация тўлиб берилади. Лойиҳа ва қурилиш ишларига камида икки йил вақт кетади, – деди вазир
