Бугун шунингдек, вилоят ҳокими Ботир Зарипов сектор раҳбарлари ва бошқа тегишли масъуллар иштирокида Бухоро шаҳридаги марказий деҳқон бозорида бўлди.
Бозорда одатдагидек жараён. Совуқ об-ҳаво туфайли харидорлар оқими ҳам ҳар кунгидек эмас. Бирон раста ёки савдо дўконида навбатда турганлар кўринмайди.
Вилоят раҳбари бу ерда сотувчилар билан суҳбатлашиб, савдо, санитария-гигиена қоидаларига қатъий риоя қилиш, айниқса, нарх-навони сунъий ошириб юбормаслик бўйича тавсияларини берди. Арзонлаштирилган савдо ярмаркаси ҳамда бозор расталаридаги нархлар билан қизиқди.
Мутасаддиларнинг навбатдаги манзили айни шу бозор бўлди. Ноқулай об-ҳаво шароити, айниқса, сўнгги кунларда кузатилаётган совуқ иқлим бевосита қишлоқ хўжалиги маҳсулотларига салбий таъсир этиши, аниқроғи, совуқ уриши мумкин. Шундан келиб чиқиб, вилоят раҳбари маҳсулотлар сақланаётган омборларда илиқ ва салқин ҳароратни бир маромда сақлаш бўйича кўрилган чоралар билан танишди. Бу борада ҳам зарур тавсиялар берилди.
Шунингдек, кундалик озиқ-овқат ва қишлоқ хўжалиги маҳсулотлари захирасини яратиш борасида амалга оширилган ишлар яқиндан ўрганилди.
Аҳолини келаси пишиқчилик мавсумига қадар сифатли қишлоқ хўжалиги маҳсулотлари билан узлуксиз таъминлаш, эҳтиёж молларининг қўшимча заҳирасини яратиш бўйича вазифалар белгиланди.
