Кадастр агентлиги Бухоро вилоят бошқармаси ва унинг тасарруфидаги туман, шаҳар бўлимлари инспекторлари томонидан 2022-йилнинг 11 ойи давомида вилоятда 864 та ҳолатда 135,1 гектар ер майдони ўзбошимчалик билан эгаллаб олингани аниқланган. Бу ҳақида бошқарманинг ахборот хизмати маълум қилди.
Таъкидланишича, энг кўп қонунбузарликлар Ғиждувон тумани (114), Олот тумани (95) ва Бухоро туманида (88) қайд этилган. Ноқонуний эгаллаб олинган ерлар ҳажми бўйича Бухоро тумани (54 гектар), Қоровулбозор тумани (24 гектар) ва Олот тумани (13,75 гектар) «пешқадамлик» қилмоқда.
Шунингдек, Кадастр агентлиги томонидан ўтказилган назорат тадбирларида жами 306 та ҳолатда ер тузиш лойиҳаларидан ўзбошимчалик билан четга чиқиш, 1722 та ҳолатда кўчмас мулкка бўлган ҳуқуқни давлат рўйхатидан ўтказиш учун ўз вақтида мурожаат этмаслик, 15 та ҳолатда суғориладиган ерларни ўзбошимчалик билан эгаллаб олиш бўйича чораларни кўрмаслик ҳолати аниқланган.
Ер майдонларини ўзбошимчалик билан эгаллаб олинган ҳолатлар бўйича ўтказилган назорат тадбирларида 215 та ҳолатда қонунбузарлик ихтиёрий бартараф этилган, 697 та ҳолат бўйича судларга даъво аризаси киритилган.
