АҚШ Мудофаа вазирлиги 2035 йилгача Хитой ядро арсенали 1500 та жанговар каллакка ошади, деб ҳисобламоқда.
Пентагоннинг Хитой ҳарбий қудрати ҳақидаги йиллик ҳисоботида айтилишича, Пекин ҳозирда ўз арсеналида 400 дан ортиқ жанговар ядро каллакка эга. Бироқ, ядро арсеналини ошириш ҳаракатлари оқибатида 2035 йилга бориб каллаклар сони 1500 тага етиши мумкин. Хитой Халқ озодлик армияси ракета қўшинлари 2021 йилда синов ва ўқув мақсадларида тахминан 135 та баллистик ракета учирган.
«Бу уруш ҳудудларида баллистик ракеталардан фойдаланишни ҳисобга олмаганда, бошқа барча давлатларникидан кўпдир», дейилади ҳисоботда.
Пекин шунингдек, учта янги полигонни қуришни бошлаб юборган. У ерда 300 та қитъалараро баллистик ракета шахталари жойлашади. Пентагон Хитойни «АҚШ миллий хавфсизлиги ҳамда эркин ва очиқ халқаро тизим учун энг жиддий ва тизимли муаммо» деб атаган.
Хитой ўз ядро арсеналини ошириш режаларига қарамай, АҚШ салоҳиятидан ўзиб кета олмайди. Айни пайтда Қўшма Штатларда ядро каллаклари сони қарийб 3800 тани ташкил қилади.
