Каналимизда Бухоро вилояти Экология ва атроф-муҳитни муҳофаза қилиш бошқармаси ҳузурида жорий йилнинг сентярь ойига қадар фаолият кўрсатган Санитар тозалаш хизматларини ташкил этиш маркази ходимларининг билдирган мурожаати юзасидан қуйидагилар маълум қилинади.
Ўзбекистон Республикаси Президентининг 2022 йил 11 августдаги “Санитар тозалаш ишларини ташкил этиш ва аҳоли пунктларида тозаликни таъминлаш бўйича қўшимча чора-тадбирлар тўғрисида”ги ПҚ-349-сон қарори билан Санитар тозалаш ишларини ташкил этиш республика маркази ҳамда унинг Қорақалпоғистон Республикаси, вилоятлар ва Тошкент шаҳар бўйича ҳудудий филиаллари фаолиятини йўлга қўйиш билан боғлиқ ишлар амалга оширилмоқда.
Шу асосда Давлат экология қўмитасининг тегишли буйруғи билан Ўзбекистон Республикаси Меҳнат кодексининг 100-моддаси 2-қисми 1-бандига мувофиқ ҳудудий бошқарма раҳбарларига ходимларнинг меҳнат шартномасини бекор қилиш тўғрисида белгиланган тартибда огоҳлантириш ва лавозими қисқартирилган ходимларни ҳудуддаги меҳнат органлари билан биргаликда ишга жойлаштиришда амалий ёрдам кўрсатиш вазифалари юклатилган. (Бундай ҳолатларда, корхона тугатилаётганда ходимларга меҳнат шартномаси бекор қилиниши ҳақида огоҳлантириш хати берилиши назарда тутилган).
Ўз навбатида, Санитар тозалаш ишларини ташкил этиш республика маркази ва унинг ҳудудий филиалларини малакали кадрлар билан таъминлаш Давлат экология қўмитаси томонидан тасдиқланган махсус ишчи комиссия томонидан амалга оширилиши белгиланган бўлиб, айни пайтда бу борада ишлар олиб борилмоқда.
Шу ўринда таъкидлаб ўтиш жоизки, ҳудудий бошқармалар ҳузуридаги Санитар тозалаш хизматларини ташкил этиш марказлари ходимларининг иш ҳақи ҳамда компенсация тўловларидан мавжуд қарздорлигини тўлаш бўйича амалий саъй-ҳаракатлар йўлга қўйилмоқда.
Бухоро вилояти Экология бошқармаси матбуот хизмати
