Хитой-Ўзбекистон илмий тадқиқот марказининг очилиш маросими бўлиб ўтди
Хитой Қишлоқ хўжалиги фанлари академиясининг Озиқ-овқат фанлари ва технологияси институти ва Бухоро муҳандислик-технология институти ўртасида тузилган келишув доирасида 2024 йил 9-10 октябрь кунлари Бухоро муҳандислик-технология институтида Хитой-Ўзбекистон лойиҳалари алмашинуви учрашуви бўлиб ўтди.
Дастлаб, институт ректори Садоқат Сиддиқова Хитой делегациясига институтда яратилган илмий-тадқиқот лабораториялари ва уларда олиб борилаётган илмий-тадқиқот ишлари ҳақида маълумот берди ҳамда ушбу лойиҳанинг ҳам Ўзбекистон ва Хитой илм-фани ҳамда иқтисодиётининг ривожланишига ҳисса қўшишини айтиб ўтди.
Хитой делегацияси раҳбари профессор Аймин Ши институтимиз ректори ва Ўзбекистонлик лойиҳа иштирокчиларига ушбу учрашувни ташкил қилганликлари учун миннатдорчилик билдирди.
Ундан кейин Ўзбекистон ва Хитой лойиҳанинг бориши ҳақида Хитойдан лойиҳа раҳбари профессор Син Гуо ва Ўзбекистондан лойиҳа раҳбари профессор Карим Гафуров ҳисобот бердилар ва учрашув қатнашчилари томонидан савол-жавоб ва мунозаралар ўтказилди.
Учрашув давомида ҳозиргача иккала ҳамкор томонларидан бажарилган илмий-тадқиқот ишларига ижобий баҳо берилиб, келгусидаги бажариладиган ишлар белгилаб олинди.
Учрашув якунида Бухоро муҳандислик-технология институтида фаолият олиб борилаётган Мойли хомашёларни қайта ишлаш ва қўшимча маҳсулотлардан комплекс фойдаланиш Хитой-Ўзбекистон илмий тадқиқот марказининг очилиш маросими бўлиб ўтди.
