Оила муқаддас даргоҳ. Оиланинг тинч, фарзандларнинг бахтли бўлишида эр-хотиннинг ўзаро бир-бирини қўллаган ҳолда муносабатда бўлиши муҳим роль ўйнайди. Бахтли оилалар туфайли бахтли жамият вужудга келади.
Оиланинг тинч, фарзандларнинг бахтли бўлишлигида эр-хотиннинг ҳар иккиси ҳам оиладаги ўз бурчларини астойдил адо этишга интилишлари муҳимдир.
Фуқаро З.Кабулова оилавий келишмовчилик сабабли 2021 йилнинг февраль ойида икки нафар фарзанди билан эрининг уйидан чиқиб, ота-онасининг уйига кетди.
Бу ҳолат З.Кабулованинг ҳаётида биринчи маротаба эмас эди. Вояга етмаган фарзандларининг моддий таъминоти учун алимент ундируви бўйича Фуқаролик ишлари бўйича Бухоро туманлараро судига мурожаат қилди.
Суд буйруғи ижросини таъминлаш учун Мажбурий ижро бюроси Бухоро туман бўлими иш юритувига юборилди.
Бир неча бор огоҳлантиришларга қарамасдан қарздор Ж.Закиров томонидан алимент пуллари ўз вақтида тўлиқ тўланмаганлиги сабабли, Жиноят ишлари бўйича Пешкў туман судининг 17.06.2021 йилдаги қарорига асосан унга нисбатан 15 сутка маъмурий қамоқ жазоси тайинланди.
Қарздор ўзига тегишли хулоса чиқармай вояга етмаган фарзандлари моддий таъминоти учун тўлаши керак бўлган алимент пулларини ўз вақтида тўламасдан келганлиги туфайли Ж.Закировга нисбатан Ўзбекистон Республикаси Жиноят Кодекснинг 122-моддаси билан жиноят иши қўзғатилиб, суриштирув ҳаракатлари бошланди.
Суриштирув жараёнида ундирувчи З.Кабулова ва қарздор Ж.Закировлар ўзаро ярашиб, келишганликлари сабабли Жиноят ишлари бўйича Бухоро туман судининг 11.05.2022 йилдаги ажримига асосан Ж.Закиров жиноий жавобгарликдан озод қилинди.
Асосийси жамиятнинг ўзаги бўлган яна бир оила қайта тикланди, болаларнинг ўз уйларида ота-оналари бағрида яшашларига нима етсин.
Бюронинг Бухоро туман бўлими давлат ижрочиси А.Қандахоров
