Куз-қиш мавсумига тайёргарлик кўриш ва уни беталофат ўтказиш бўйича Вобкент туманидаги барча корхона, ташкилот, маҳалла ва туман штаби аъзолари иштирокида йиғилиш ўтказилди.
Вобкент туман ҳокимлигида вилоят ҳокимининг биринчи ўринбосари Б.Ахмедов, туман ҳокими Ф.Умаров ва туман сектор раҳбарлари, ҳоким ўринбосарлари, ишчи гуруҳи томонидан туман ҳокимлиги ва ташкилотлар раҳбарлари иштирокида 2023/2024 йилларда куз-қиш мавсумига тайёргарлик кўриш ва уни беталофат ўтказиш тўғрисида йиғилиш ўтказилди. Йиғилишни туман ҳокими Ф.Умаров олиб борди.
Мазкур йиғилишда ҳудудларда олиб борилаётган ишлар муҳокама қилиниб, ижтимоий соҳа объектлари, иқтисодиёт тармоқлари ҳамда аҳоли яшаш уйларини энергия ресурслари билан барқарор таъминлаш, қишнинг қаҳратон кунларида салбий ҳолатлар юзага келишининг олдини олишга қаратилган долзарб вазифалар белгиланди.
Шунингдек йиғилишда сўзга чиққан вилоят ҳокимининг биринчи ўринбосари Б. Ахмедов куз-қиш мавсумини беталофат ўтказиш, бу борада режаланган ишларни ўз вақтида бажариш, аҳоли муаммолари билан ишлаш ва уларни ҳал этиш, ўрганишлар натижасида жойлардаги кўплаб камчиликлар аниқланганлиги ва бу камчиликларни тезкор бартараф этилиши тўғрисида мутасаддиларга топшириқлар берилди.
