Вобкентда байроғимиз қабул қилинган кун муносабати билан юриш марафони ўтказилди.
Вобкент туман ҳокимлиги ташаббуси билан “Байроғимиз – фахримиз, ғуруримиз” шиори остида юриш марафони ташкил этилди.
Мазкур тадбир Ўзбекистон Республикаси Давлат байроғи қабул қилинганлигининг 32 йиллигини кенг нишонлаш, давлат рамзларига нисбатан ҳурмат туйғуларини янада юксалтириш, “Бешта муҳим ташаббус” доирасида тизимда амалга оширилаётган ишлар кўламини кенгайтириш, давлат ташкилотлари ўртасида соғлом турмуш тарзини тарғиб этиш ҳамда спортни оммалаштириш мақсадида ўтказилмоқда. Юриш марафони Вобкент тумани маркази А.Дониш кўчаси бўйлаб ташкил этилиб, марра тумандаги марказий ўйингоҳ бўлди.
Вобкент туман ҳокимлиги ташаббуси билан умумий узунлиги 1.5 километр масофа бўлган марафонда Вобкент туман ИИБ ва Миллий гвардия ходимлари, Вобкент туман Тиббиёт бирлашмаси ходимлари ва Аҳоли соғлом турмуш тарзини қўллаб қувватлаш ва жисмоний фаоллик ошириш маркази туман бўлими, Спорт мактаби, Мактабгача ва мактаб таълими бўлими, Ёшлар ишлари агентлиги, маҳалла ходимлари ва кўнгилли ёшлардан иборат 500 га яқин фуқаролар иштирок этди.
Шунингдек, туманда ташкилот ва муассасалар ходимлари ўртасида бир қанча спорт тадбирлари ўтказилиб келинмоқда. Президентимиз томонидан илгари сурилган бешта муҳим ташаббус ижросини таъминлаш бўйича барча ташкилот ва муассасалар ходимларининг фарзандларини ҳам спорт соғломлаштириш тадбирларига жалб қилиш ишлари режалаштирилган.
Вобкент туманида бу каби тадбирлар ҳам туманимизнинг барча маҳаллаларида бўлиб ўтмоқда.
