Жорий йилги пахта ҳосили учун Ромитан туманида 10 минг 650 гектар майдонга чигит экиш режалаштирилган. Чигитни мақбул муддатларда, тез ва сифатли экиб, ўндириб олиш мўл ҳосил етиштиришда ўз самараларини беради. Бунинг учун мавжуд техникалар кучидан оқилона фойдаланишга тўғри келади. Шу мақсадда туманда 40 та чигит экиш сеялкаси, 58 та чизеллар, 1 минг 418 та борона таъмирдан чиқарилиб, бугунги кунда чигит экиш жараёни қизғин олиб борилмоқда.
Бугун, 28 март куни Бухоро вилояти прокурори Махмуд Истамов Ромитан туманидаги чигит экиш ишлари билан танишиб, деҳқонлар ҳолидан хабар олди.
Хусусан, “Челонғу” ҳудудидаги “Шариф” ҳамда “Аминобод” фермер хўжаликларининг жами 39,6 гектар майдонга “Бухоро-6” навли чигит экиш жараёнларини Махмуд Истамов бошчилигида вилоят фермер, деҳқон хўжаликлари ва томорқа ер эгалари Кенгаши раиси Хуршид Болтаев, туман ҳокими Умеджон Барноев, туман прокурори Фаррух Атоевлар иштирокида кузатди.
Ушбу ишларда жонбозлик кўрсатаётган фаол миришкорлар вилоят прокурори томонидан эътироф этилиб, уларга ун, ёғ маҳсулотлари топширилди.
Вилоят прокурори чигит экиш бўйича ташкил қилинган штаб фаолиятини кучайтириш ва сифатга алоҳида эътибор қаратиш бўйича масъулларга тегишли топшириқлар берди.
