Шу йил Бухоро шаҳрининг 6-кичик ноҳияси ҳудудида иш бошлаган, тадбиркор аёл Дилором Қудратова томонидан бошқарилаётган “Бухоро коммунал сервис” МЧЖ тақдим этаётган хизматлардан мулкдорлар мамнун.
Яқиндагина компаниянинг янги маъмурий биноси бунёд этилиб, фойдаланишга топширилди. Эндиликда бу ерда 20 дан зиёд коммунал хизмат турларини амага ошириш имконияти юзага келди. Иш тартиби — 24/7 режимида.
Эътиборлиси, 74 та кўп квартирали уйлардаги 3874 та хонадонларга сифатли коммунал хизматларни тақдим этаётган бошқарув сервис компаниясида 55 та янги иш ўринлари яратилди. Ишга қабул қилинганларнинг аксарият қисмини аёллар ташкил этади.
Айни қишки иситиш мавсумида тез-тез учраб турадиган техник носозликларнинг олдини олиш ва ўз вақтида бартараф этиш мақсадида туну-кун давомида мулкдорлардан тушаётган мурожаатларни қабул қилиш имконияти яратилиб, диспетчерлик хизмати ташкил этилганлиги ҳам аҳолининг оғирини енгил қилмоқда.
Айни вақтда вилоят ҳокими Ботир Зарипов тегишли вилоят ҳокими ўринбосарлари, шаҳар секторлари, коммунал соҳа мутасаддилари ҳамроҳлигида мазкур бошқарув компаниясида бўлиб, унинг фаолияти билан яқиндан танишмоқда. Бошқарув сервис компанияси раҳбарияти билан ҳудуддаги аҳолини ўйлантираётан муаммолар ҳақида мулоқот қилмоқда. Уларни бартараф этиш чоралари белгиланмоқда.
Шунингдек, вилоят раҳбари маҳалла ҳудудида компания томонидан амалга оширилган ободонлаштириш ишларини кўздан кечирди. Ишчи ходимлар, аҳоли вакиллари билан мулоқот қилди. Уларнинг дарду ташвишлари билан қизиқди.
7-уй 26-хонадонда яшовчи Абдулла Ёдгоров 73 ёшда. Оғир хасталик туфайли 6 ойдан бери тўшакка михланган. Хонадон бекаси Лутфия Каримова вилоят раҳбарига юзланиб, турмуш ўртоғини даволатиш зарурлигини, бироқ ўзларида бунга етарли имкон йўқлигини айтди. Ботир Зарипов мазкур хонадонда бўлиб, бемордан ҳол аҳвол сўради. Шу тариқа уни даволатиш бўйича чоралар кўриладиган бўлди.
