Пайғамбаримиз алайҳиссалом ҳадиси шарифларидан бирида «Ким рўзадорни ифтор қилдирса, унга унинг ажрича ажр бўлур. Шу билан бирга, рўзадорнинг ажридан ҳеч бир нарса кам бўлмас» (Имом Термизий ва Имом Аҳмад ривояти) дея марҳамат қилганлар.
Рамазон шукуҳи қалбларга мусоффолик ва сокинлик олиб кирмоқда. Бу ойда кексалар, боқувчисини йўқотганлар, беморлар ҳамда имконияти чекланганлар ҳолидан хабар олиниб, уларга меҳр улашилмоқда.
Муборак Рамазон ойи муносабати билан Ромитан тумани ҳокимлиги, “Маҳалла” хайрия жамоат фонди, Маҳалла ва нуронийларни қўллаб-қувватлаш бўлими ҳамкорлигида Ромитан туман марказидан 265 километрдан ортиқ масофада, Қизилқум кенгликлари бағрида, қўшни Хоразм вилоятига чегарадош, мамлакатимизнинг жанубий “қон томири” – Амударёга ёндош жойлашганига қарамасдан, Ромитан тумани тасарруфидаги “Қизилравот” аҳоли масканида истиқомат қилаётган 114 та оила, 600 нафардан ортиқ юртдошларимиз учун ташкил этилган ифторлик тадбирига ҳудуддаги нуроний отахон ва онахонлар, эҳтиёжманд, ижтимоий ҳимояга муҳтож фуқаролар таклиф этилди. Унда туман ҳокими Умеджон Барноев, Газли шаҳар ҳокими Шерали Пўлотов, туман ҳокими ўринбосарлари ҳам иштирок этди.
Ифторлик аввалида улуғ ойда ён-атрофдагиларга меҳр-саховат кўрсатиш, яқинлар ҳолидан хабар олиш катта савоб экани таъкидланди. Ифторликда иштирок этган рўзадор нуронийлар юртга тинчлик-осойишталик, қут-барака, амалга оширилаётган бунёдкорлик ишларига ривож тилаб, дуога қўл очишди.
