“УДДАБУРОНЛАР” НИНГ ОРЗУСИ УШАЛМАДИ

Т. Тоҳирова (исм-фамилиялар ўзгартирилган) меҳнатсиз пул топиш йўлини излади. Афсуски, унинг хаёлига ўзганинг мол-мулкини яширин равишда талон-торож қилишдан бўлак фикр келмади. Аммо бу “иш” бир ўзининг қўлидан келмаслиги аниқ. Шунда Тахмина ўзича режа тузиб, ҳали вояга етмаган укаси К. Тоҳиров ва унинг синфдош ўртоғи А. Тешаевни ўзининг ноқонуний ишига шерик қилди.
Осон пул топиш йўлини “ихтиро” қилган “жамоа” Т. Тоҳированинг кўрсатмасига асосан Когон шаҳар, Олтинкўл кўчаси 65-уйда яшовчи Ф. Жалиловнинг яшаш хонадонига дераза орқали ғайриқонуний равишда кириб, яшаш уйи ётоқхонасидаги тумбочка тортмасидан унга тегишли бўлган 1.700.000 сўм миқдоридаги пулни яширин равишда ўғирлаб, воқеа жойидан яширинишди.
Мазахўрак бўлган “уддабуронлар” Когон шаҳар, Хива кўчаси, 12-уй 9-хонадонда яшовчи Р. Акмеевнинг яшаш хонадонига дераза орқали ғайриқонуний равишда кириб, хонадаги сандиқ ичидан унга тегишли бўлган 2.000.000 сўм пулни ҳам ўзлариники қилишди. Меҳнатсиз пул топишга ўрганганлар Когон шаҳар, Навбаҳор кўчаси, 10-уйда яшовчи Р. Аминовнинг яшаш уйига, тандирхонаси девори орқали ғайриқонуний равишда кириб, ушбу уйига туташ дўконидан турли буюмларни ўғирлаб, жабрланувчига 140.000 сўмлик моддий зарар етказишди.
Нафси ҳакалак отган гуруҳ яна бир қанча инсонларнинг “чўнтагига қўл суқиб”, текин келган пулларни ўз эҳтиёжлари учун сарфлаб юришди. Лекин, кўза кунида синади. Бу “ишбилармонлар” нинг ҳам югурганлари суд курсисигача бўлди. Инкор этиб бўлмас далиллар олдида ҳеч бир баҳонага ўрин қолмади.
Ҳалол пешона тери орқали топилмаган пул бир куни эгасини элнинг олдида бошини эгиши яна бир бор исботини топди. Бу эса баъзи ўзбошимча ёшлар учун яхшигина дарс бўлиши шубҳасиз.
Я. НИЁЗОВ,
Когон шаҳар ЖИБ суди раиси