“Халқ давлат идораларига эмас, балки давлат идоралари халқимизга хизмат қилиши керак” деган тамойил асосида бугун жойларда аҳоли мурожатлари ўрганилмоқда. Ҳар бир мурожаатнинг ижобий ечими эса фуқаро манфаатларини ҳимоя қилишда хизмат қилади.
Бу борада бошқарма томонидан йўловчиларга кўрсатилаётган транспорт хизматларини яхшилаш, шаҳарларни туман маркази билан, туман марказини қишлоқлар билан боғловчи йўналишлар тармоғини ташкил этиш ҳамда аҳолидан келиб тушаётган мурожаатларни ўз вақтида ижобий ҳал этилишини таъминлаш бўйича зарурий чоралар кўрилиб, келиб тушаётган ҳар қандай мурожаат эътибордан четда қолаётгани йўқ.
Хусусан Бухоро тумани Янги Турмуш МФЙ да яшовчи фуқаронинг 286-сонли “Гала-Осиё-Арабхона” йўналишли такси йўналишидаги транспорт воситалари ҳаракатидан норози бўлиб қилган мурожаати жойига чиққан ҳолда ўрганиб чиқилди.
Тадбир давомида ушбу йўналишдаги ҳаракат интервали, транспорт воситаларининг техник ҳолати, ички ва ташқи жиҳатдан тозалиги, лицензия варақаларининг мавжудлиги ўрганилди. Аниқланган қоидабузарликлар бўйича тегишли тартибда баённомалар расмийлаштирилди.
Худди шундай Когон шаҳрида яшовчи фуқаронинг 114-сонли “3-мактаб-Когон бош бекати” йўналишида ҳаракатланувчи транспорт воситаларининг ҳаракатидан норози бўлиб қилган мурожаатига ижобий ечим топиш мақсадида ўтказилган ўрганишлар давомида ҳам қатор қоидабузарликлар аниқланиб, бошқарма ваколати доирасида тегишли чоралар кўрилди.
Шунингдек, Бухоро автошох бекатида шаҳарлараро йўналишларда йўловчи ташиш фаолияти билан шуғулланувчи ҳайдовчилар билан ўтказилган ҳуқуқий тарғибот тадбирлари давомида ҳайдовчиларга автомобиль транспортида йўловчи ташиш соҳасига оид норматив-ҳужжатлар ва қонунчилик тўғрисида маълумот берилди.
Автомобиль транспортида йўловчи ташишда лицензия олиш тартиби бўйича тушунтиришлар олиб борилди. Ўзбекистон Республикаси Президентининг 2022 йил 7 июлдаги “Автотранспорт воситаларини бошқаришда ва йўналишсиз такси фаолиятини амалга оширишда қўшимча қулайликлар яратиш тўғрисида”ги 311-сон қарори асосида йўналишсиз такси фаолиятини амалга оширишда яратилган қўшимча қулайликлар тўғрисида тушунча ва тавсиялар берилди.
Шу ўринда барча йўловчи ташувчи корхоналардан автомобиль транспортида йўловчи ташишда Ўзбекистон Республикасининг амалдаги қонунчилигига, “Лицензия талаблари ва шартлари”га қатъий риоя қилган ҳолда ташувларни амалга ошириш лозимлигини сўраб қоламиз. Кўрсатилаётган хизматлар сифатини ошириш борасидаги ўрганиш тадбирлари эса доимий тарзда ўтказиб борилишини маълум қиламиз.
Бухоро вилояти Транспорт бошқармаси Матбуот хизмати.
