Бухоро давлат университети фаолияти билан яқиндан танишиш мақсадида Ўзбекистон Республикаси Ташқи ишлар вазири ўринбосари, Бухоро давлат университети Кузатув Кенгаши аъзоси – Владимир Норов университетга ташриф буюрди.
Дастлаб меҳмонни БухДУ ректори Обиджон Хамидов ва университет раҳбарияти кутиб олиб, талабалар таълим олиши учун яратилган шарт-шароитлар билан таништиришни бошлади. Владимир Норов янгидан ташкил этилган университет Ахборот ресурс марказида бўлиб, адабиётлар билан танишиб, электрон китоблар базасини кўздан кечирди. Шунингдек, Рақамли иқтисодиёт ва инсон ресурсларини ривожлантириш IT марказида бўлиб, университетда фаолият юритаётган UNIWORK рақамли платформаси билан танишди. Марказ ходимларига жаҳон сунъий интеллект технологияларини ўзлаштириш бўйича тегишли таклиф ва тавсияларни берди.
Ташриф давомида Ташқи ишлар вазири ўринбосарига БухДУ бизнес акселлератор биносида фаолият юритаётган RobotsAndME робототехника марказининг фаолияти бўйича тақдимот қилинди. Вазир ўринбосари бош бино 2-қаватда янгидан ташкил этилган Ахборот технологиялари факультети ўқув хоналарини кўздан кечирди, у ерда талабаларга IT кўникмаларини сингдириш борасида давом этаётган амалий лойиҳалар жараёни билан танишди.
Учрашув давомида Президент Шавкат Мирзиёев раислигида 4 март куни олий ўқув юртлари талабалари бандлигини таъминлаш бўйича устувор вазифаларга бағишланган видеоселектор йиғилишида берилган топшириқлар, университетнинг таълим жараёнида ижтимоий шериклик тамойилларини самарали амалга ошириш, таълим сифатини яхшилаш, таълим жараёнини такомиллаштириш ва стратегик ривожлантиришни таъминлаш ҳамда моддий-техника базасини мустаҳкамлаш, олий таълимни ривожланишига кўмаклашувчи янги шакл, дастур ва истиқболли ташаббусларни қўллаб-қувватлаш, илмий ишланмалар натижаларини амалиётига самарали жорий этиш, ўзаро ҳамкорлик тўғрисида ҳамкорлик келишувларини тузиш амалиётини ривожлантириш ва уларни амалга ошириш, таълим ва фан соҳасида халқаро ҳамкорликни ўрнатиш ва ривожлантиришга қаратилган амалий ишлар юзасидан таклифлар тингланди.
Рустам Раҳимбоев,
БухДУ Жисмоний маданият факультети талабаси
