Аввал хабар берилганидек,кеча, 23 август куни Президент Шавкат Мирзиёев Бухоро халқаро аэропорти биносида мутасадди раҳбарлар иштирокида йиғилиш ўтказди.
Йиғилишда таъкидланганидек, асосий мақсад – Бухорода бошланган кенг миқёсли ислоҳотларни жадал давом эттириш.
Бугундан эса мутасаддилар берилган топшириқлар ижросини таъминлаш, муаммоларни чуқур таҳлил қилиш ва самарали ҳал этишга киришдилар.
Хусусан, вилоят ҳокимининг биринчи ўринбосари Фарҳод Умаров, вилоят прокурори Дилшод Файзиев ва бошқа мутасаддиларнинг Шофиркон туманига ташрифи давомида халқ таълими тизимидаги таълим даргоҳларининг янги ўқув йили ва куз-қиш мавсумига тайёргарлигига эътибор қаратилди.
Айни кунда туманда 56 та умумтаълим мактаби, “Баркамол авлод” болалар маркази фаолият юритаётган бўлса, улардаги ўғил-қизлар сони 28 минг 680 нафарга етган. Туманда баркамол авлодга таълим-тарбия беришдек масъулиятли ишга 3 минг нафар педагог жалб қилинган бўлиб, уларнинг 2 минг 145 нафарини аёллар ташкил қилмоқда. Республика Вазирлар Маҳкамасининг 2019 йил 16 июлдаги топшириғи ижросини таъминлаш мақсадида тумандаги 2 та касб-ҳунар коллежи туман халқ таълими бўлими тасарруфига ўтказилди.
2019-2020 ўқув йилида туманда умумтаълим мактабларини 4913 нафар ўғил-қиз битирган бўлса, шундан 11-синф битирувчиларига 20 та олтин ва 4та кумуш медаллар топширилган. Бошланаётган ўқув йилида тумандаги умумтаълим мактаб ўқитувчи ва ўқувчиларини “PISA”, “TIMSS”, “PIRLS” халқаро баҳолаш дастури бўйича олиб бориладиган танловларда иштирокини таъминлаш, 20 та таълим даргоҳи директори ҳамда 650 нафар педагогнинг малакасини ошириш мақсад қилинган.
Янги ўқув йили олдидан туманда 12 та умумтаълим мактабининг том қопламаси ва ўқув биноларининг ташқи фасад қисми таъмирланиб, эскирган эшик-деразалар ромлари янгисига алмаштирилмоқда. Шунингдек, 9 та умумтаълим мактаби тоза ичимлик суви билан таъминланган бўлса, қолган 47 та таълим даргоҳида ташиб келтириладиган сувни сақлаш учун алоҳида сиғимлар шай қилинган. Маҳаллий бюджет маблағи ҳисобидан бу йил 6 та умумтаълим мактабида замонавий тежамкор қозон ўрнатиш ва иситиш тизимини мукаммал таъмирлаш мақсадида 1 миллиард 150 миллион сўм маблағ ажратилган. Ҳудуддаги 24-, 50- ва 51-сонли умумтаълим мактаблари ва 3-сонли ИДУМИ нинг иситиш тизими янгиланиб, 11 дона қозон алмаштирилган.
Вилоят мутасаддилари “Тезгузар” МФЙ даги 6-сонли, “Вардонзе” МФЙ даги 7-сонли умумтаълим мактаблари мисолида янги ўқув йили ва куз-қиш мавсумига тайёргарликнинг боришига баҳо бердилар. Масъулларга таълим даргоҳларидаги якунига етмаган таъмирлаш ишлари, ҳудудни ободонлаштириш билан боғлиқ нуқсон ва камчиликларни тез фурсатда сифатли бартараф этиш, мактабларни зарур жиҳозлар ва ўқув қуроллари билан таъминлашга доир топшириқ ва кўрсатмалар берилди.
