Япония Ўзбекистоннинг ишончли ҳамкори бўлиб, икки мамлакатни ўзаро ҳурматга асосланган яқин дўстлик муносабатлари бирлаштириб туради.
Қувонарлиси, сўнгги йилларда мамлакатларимиз ўртасида тиббиёт соҳасида олиб борилаётган ҳамкорлик алоқалари янада ривожланиб бормоқда. Айниқса, мамлактимиз Президенти Шавкат Мирзиёевнинг Японияга қилган расмий ташрифи икки томонлама муносабатларда бутунлай янги босқични бошлаб берди.
Бугунги кунда давлатларимиз ўртасида тиббий кадрларни тайёрлаш, касалликлар муолажаси ва профилактикаси, соҳани рақамлаштириш каби қатор йўналишларда амалга оширилаётган қўшма лойиҳалар Ўзбекистон тиббиётини янада тараққий этишига хизмат қилмоқда.
Қайд этиш жоиз, япон тиббиётининг эришган ютуқлари, мураккаб жарроҳлик амалиётлари, илғор ташхислаш усуллари бутун дунёда инсонлар саломатлигини тиклаш ва касалликларнинг олдини олишда дастурил амал бўлмоқда.
Ҳукуматимиз томонидан тиббиётни ривожлантириш орқали соҳани дунё миқиёсида янги босқичга олиб чиқиш каби режалар халқаро миқиёсда ташкил қилинган грант лойиҳаларида ўз аксини топмоқда.
Шуни қувонч билан айтиш мумкинки, бизнинг Республика шошилинч тиббий ёрдам илмий маркази (РШТЁИМ) Бухоро филиали яқинда ана шу грантлардан бирини қўлга киритди. Бу лойиҳа асосида 111,7 минг доллар миқдоридаги маблағларга “Гистероскоп” ва “Артроскоп” каби иккита замонавий ускунага эга бўлдик.
Соғлиқни сақлаш вазирлигида Япониянинг мамлакатимиздаги Фавқулодда ва мухтор элчиси Хатори Такаши жаноблари ва РШТЁИМ Бухоро филиали директори М.Ражабовлар ўртасида грант шартномаси имзоланди.
Мулоқот чоғида Хатори Такаши Япония бундан кейин ҳам Ўзбекистонда юқори сифатли тиббий хизматлардан фойдаланиш имкониятларини яхшилашга ҳисса қўшишда ҳамкорликни давом эттиришини таъкидлади.
Икки томонлама мулоқот ва муносабатлар Ўзбекистон ва Япония ўртасидаги дўстона алоқаларнинг янада мустаҳкамланишига хизмат қилади.
РШТЁИМ Бухоро филиали Ахборот хизмати.
