Ўқувчиларга иккита хорижий тил ва касб-хунар ўргатиш тизимини намунали ташкил этаётган мактаб
Вилоят халқ таълими бошқармаси томонидан ташкил этилган пресс-тур давомида оммавий ахборот воситалари вакиллари, мустақил журналистлар ва блогерлар Ромитан туманидаги 1-ихтисослаштирилган давлат умумтаълим мактабининг бу борадаги намунали фаолияти билан яқиндан танишдилар.
Пресс-тур давомида Ромитан туманидаги 1-ихтисослаштирилган давлат умумтаълим мактабида туман ўқувчилар томонидан яратилган ҳунармандчилик буюмлари кўргазмаси ташкил этилди ва мактаб фаолияти билан яқиндан танишилди.
Айтиш жоизки, Ромитан туманидаги 43 та мактабнинг ҳар бирида ўқувчиларга иккита хорижий тил ва касб-ҳунар ўргатишда ўзига хос ташаббус йўлга қўйилган бўлиб, айниқса, тажрибали маскан сифатида танлаб олинган 1-ИДУМда жараёнлар кенг қамров касб этмоқда.
1-ИДУМнинг 9-, 10-, 11-синфларида айни пайтда жами 296 нафар ўқувчи бўлиб, улар иштирокида ўтказилган сўровнома, таҳлил ва ўрганишлар натижасида ўқувчининг 213 нафари ёки 72 фоизи олий таълимга кириш истагини билдирган бўлса, 83 нафари ёки 28 фоизи касб-ҳунарга қизиқишини маълум қилган. Ёшларни ҳам илм-маърифат, ҳам касб борасида камолотига эришиш борасидаги фаолиятга шу асосида ёндашилмоқда.
Аввало, ўқувчиларга чет тилларини сифатли ва мукаммал ўргатиш алоҳида эътиборда. Бунда хорижий тил фани ўқитувчиларининг салоҳиятини оширишга аҳамият қаратилди. Айни пайтда мактабда фаолият олиб бораётган 15 нафар фан ўқитувчиларининг барчаси тил билиш даражасини белгиловчи халқаро сертификатларга эга. 10-11 синф ўқувчиларининг 12 нафари ҳам халқаро ва миллий сертификатларни қўлга киритишди.
Қўшимча тил сифатида корейс тили дарслари ташкил этилиб, малакали ўқитувчилар томонидан машғулотлар олиб борилмоқда.
Шунингдек, мактабда «Зўр!»(«Класс») лойиҳаси доирасида россиялик педагог Виктория Литвин томонидан ўқувчиларга рус тили фани ҳам чуқур ўқитилмоқда.
