Ромитан туманида ижтимоий ҳимояга муҳтож оилаларнинг турмуш шароитларини яхшилаш, уларнинг иқтисодий жиҳатдан оёққа туриши учун имкониятлар яратиш, жамиятдаги ўрнини ошириш ҳамда мавжуд муаммоларини ҳал этиш мақсадида чора-тадбирлар амалга ошириб келинмоқда.
Хусусан, бугун, 17 апрель куни Ромитан тумани ҳокими Умеджон Барноев 1-секторга қарашли “Азизон”, “Қўрғон” ва “Бахтиёрчи” маҳалла фуқаролар йиғинларидаги ижтимоий ҳимояга муҳтож, боқувчисини йўқотган ҳамда ногиронлиги бор бўлган хонадонларга ташриф буюриб, уларнинг яшаш шароитлари билан яқиндан танишди.
Ташриф давомида 1-сектор раҳбари томонидан фуқароларнинг ижтимоий-моддий аҳволи ўрганилиб, кўмак кўрсатиш бўйича бир қатор чора-тадбирлар мутасадди раҳбарлар иштирокида белгилаб олинди. “Маҳалла” хайрия жамоат фонди ҳузуридаги “Саховат кўмак” жамғармаси маблағлари ҳисобидан 5 та оилаларга 13 хил турдаги озиқ-овқат ва қурилиш материаллари етказиб берилди.
Бундан ташқари “Бахтиёрчи” маҳалла фуқаролар йиғини “Янги турмуш” қишлоғида яшовчи, боқувчисини йўқотган Давлетова Сатима хонадонида бўлиб, ҳолидан хабар олди. Сатима Давлетова ҳозирги кунда ишсиз, уч нафар фарзанднинг онаси. Бугунги кунда ушбу оила кўмакка муҳтож. Ушбу оиланинг турмуш шароитини яхшилаш мақсадида хонадонни таъмирлаш, ҳудудни ободонлаштириш, ички йўлни шағаллаштириш ҳамда субсидия асосида асбоб-ускуна олиб берилишига келишиб олинди.
Аёлнинг ҳаётдан кўнгли тўлса, хонадони фариштали, фарзандлари бахтиёр бўлади, эртанги кунга ишонч ортади. Шундай экан, муаммоларни қайта-қайта ўрганиш, шарт-шароит яратиш борасида белгиланган вазифалар Ромитан туманида давом этаверади.
