Ишсиз ва банд бўлмаган фуқаролар, айниқса, хотин-қизлар ва ёшларнинг бандлигига кўмаклашиш, уларни меҳнат бозоридаги касбларга йўналтириш мақсадида Ромитан тумани 1-сектор аҳолиси учун ҳам “Бўш иш ўринлари меҳнат ярмаркаси” ташкил этилди.
Ромитан туман ҳокимлиги ҳамда туман Аҳоли бандлигига кўмаклашиш маркази ҳамкорлигида ўтказилган меҳнат ярмаркасида тумандаги 22 та корхона, ташкилот ва муассасалар ўзларидаги 225 та бўш иш ўринлари билан иштирок этишди.
Ушбу меҳнат ярмаркасига 1-сектор худудидаги махалла фуқаролар йиғинлари вакиллари, ташқи мехнат миграциясидан қайтган фуқаролар, ишсиз аёллар ва ёшлар иштирок этишди. Корхона ва ташкилотлардан ташриф буюрган вакиллар ўзларида мавжуд бўш иш ўринлари ҳақида батафсил маълумот беришди.
Ярмарка доирасида 205 нафар ишсиз фуқаролар қатнашиб, шулардан 26 нафари доимий ишга жойлаштирилди, 96 нафари ўзини ўзи банд қилган сифатида рўйхатга қўйилди, 15 нафари касб-ҳунарга ўқишга жалб қилинди, 27 нафарига деҳқон хўжалик очиб берилди. Натижасида жами 164 нафар ишсиз фуқароларнинг бандлиги таъминланди.
Бундан ташқари тадбир давомида тумандаги тижорат банклари томонидан юк ташиш мотоцикллари, мульти тракторлар, аёллар сартарошлик анжомлари, нон маҳсулотлари пиширгич, тикув машиналари ва бир нечта турдаги техникалар имтиёзли кредит асосида шу жойнинг ўзида фуқароларга расмийлаштириб берилди.
Аҳолига қулайлик яратиш, қиш ва баҳор мавсумида аҳоли истеъмоли учун зарур бўлган озиқ-овқат маҳсулотларини мақбул нархларда етказилишини таъминлаш мақсадида шу кунни ўзида арзонлаштирилган ярмарка ҳам ташкил этилди.
