Савдо ярмаркаларида кундалик зарурий озиқ-овқат маҳсулотлари аҳолига мақбул нархларда етказиб берилмоқда. Савдо расталари ҳар куни янги ва сифатли қишлоқ хўжалиги маҳсулотлари, салқин ичимликлар, гўшт, гуруч, умуман олганда, аҳоли дастурхони учун энг керакли ноз-неъматлар билан тўлдирилмоқда.
«Ромитан деҳқон бозори» атрофида ташкил қилинган ярмарка фикримиз далили. Бугун, 5 январь куни Ромитан туман ҳокимининг биринчи ўринбосари А.Очилов, туман прокурори Ф.Атоев, туман ИИБ бошлиғи Ш.Ҳайитов, туман ДСИ бошлиғи Б.Ғайбуллаев ҳамда тегишли ташкилотлар «Ромитан деҳқон бозори»да бўлиб, ҳудудда санитария қоидаларига риоя қилиш, нархларни сунъий оширмаслик, аҳолига сифатли ва арзон озиқ-овқат маҳсулотлари етказиб бериш бўйича мутасаддиларга керакли кўрсатма ва тавсиялар берилди.
Бозор маъмуриятининг маълум қилишича, ярмаркада аҳоли учун зарур бўлган мева-сабзавот, мол, қўй ва товуқ гўштлари, балиқ, тухум, шакар, гуруч, картошка, пиёз, қандолат каби 24 турдаги озиқ-овқат маҳсулотлари имтиёзли, қулай ва хамёнбоп нархларда сотилиши таъминланмоқда.
Шунингдек, Ромитан туман ҳокимлиги томонидан аҳолига қулайлик яратиш ҳамда истеъмол учун зарур бўлган озиқ-овқат маҳсулотларини мақбул нархларда етказилишини таъминлаш мақсадида бундай ярмаркалар маҳаллаларда ҳам ташкил этилмоқда.
