Ромитан тумани меҳнаткаш фидоийларининг 2022 йилги қишлоқ хўжалик мавсумининг муваффақиятли якунларига бағишланган ананавий “Ҳосил байрами” тадбирларида қўчқор уриштириш, миллий ўйинлар, шунингдек, халқимиз суйган санъаткор Ҳосила Раҳимова ва Ёрқинхўжа Умаровлар иштирок этиб, ўзларининг дилтортар санъатлари билан туманимиз аҳолисига хуш кайфият улашди.
Байрам туманнинг “Марказий ўйингоҳи”да халқ сайли сифатида ташкил этилди.
Тадбирда Ромитан туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари-туман иқтисодий тараққиёт ва камбағалликни қисқартириш бўлими бошлиғи Анвар Очилов сўзга чиқиб, бугунги тантана билан барчани табриклаб, қишлоқ хўжалиги фидоийлари, деҳқон ва фермерлар, туманнинг барча меҳнаткашларига миннатдорлик билдирди.
Тантанали маросимда 2022 йил туманда қишлоқ хўжалиги соҳасида муносиб ҳисса қўшган, миришкор деҳқон ва фермерлар, заҳматкаш чорвадор ва пиллакорлар, моҳир сувчи ва ирригаторлар, ўз ишининг ҳақиқий устаси бўлган механизатор ва агрономлар, отряд раҳбарлари, илғор теримчилар, соҳанинг жонкуяр фидоийлар меҳнати эътироф этилди.
Соҳа фидоийлари мутасаддилар томонидан маиший техника буюмлари, телевизор, микро тўлқинли печ, велосипед билан тақдирландилар.
Бухоро вилоят ҳокими Ботир Зарипов ромитанликларни жорий йилда қишлоқ хўжалиги соҳасида эришилган улкан ғалабаси билан табриклади.
Бу ғалабага муносиб ҳиссасини қўшган қишлоқ хўжалиги махсулотларини етиштиришда фидокорона мехнат қилаётган фермерлар, деҳқон ва томарқа хўжалиги эгалари, саховатпеша чорвадорлар, ва заҳматкаш пиллакорлар, далаларда жавлон уриб, йил бўйи пешона терини тўкиб, ҳалол мехнат қилган механизатор ва сувчилар, илғор теримчи ва ортяд раҳбарлари, деҳқончилик, чорвачилик, пиллачилик, ирригация ва мелиорация, уруғчилик ва селекционерлик, ўсимликлар ва ҳайвонлар касалликларига қарши кураш соҳасидаги илмларини пухта эгаллаб олган мутахассислар меҳнати улуғланди.
