Ромитан туманида ҳам ғалла ўрими бошқа туманларга нисбатан эртароқ келади. Табиийки, қишлоқ хўжалиги экинлари ҳам барвақт етилади. Буни дилдан ҳис этган туман ғаллакорлари жорий йилда ҳар қачонгидан мўл ҳосил етиштириш мақсадида агротехник тадбирларни ўз вақтида ва сифатли адо этганлиги боис, мўл ҳосил етиштирилмоқда.
Туманда жорий йил ғалла ҳосили ўрим-йиғими даврида жами 26 дона юқори унумли ғалла ўриш комбайни кучидан фойдаланиш кўзда тутилган бўлиб, шундан 14 таси “CASE” русумли, 7 таси “СLASS DOMINATOR–130” русумли ва 5 та “Вектор” русумли ғалла ўриш комбайнларидир. Ҳадемай, тўлиқ қувват билан ишга тушириладиган бу агрегатлар учун “ЎзКейссервис” ва “ЎзКлассервис” қўшма корхоналари ҳамда туманларда масъулияти чекланган жамияти шаклидаги “Агросервис МТП”ларининг муҳандис-техник ходимлари бириктирилган. Талаб ва эҳтиёждан келиб чиқиб, хатлов жараёнида 1,3 миллиард сўмдан зиёд маблағ эҳтиёт қисм таъминотига, таъмир ишлари учун молиялаштирилган. Мавсумда мазкур комбайнларнинг ҳар бири 300 гектар атрофидаги ғаллазор ҳосилини саранжомлашда жуда асқотади. Шу боис, кунига ҳар бир комбайнга ўртача 80 тонна атрофида ғалла ўриб олиниб, ўрим мавсумини тез кунларда тугаллаш чоралари кўрилади.
Мутахассислар мўлжалига биноан, мавсумда етиштириладиган ва қайта ишлашга йўналтириладиган ялпи хирмон салмоғи ҳам 12449 минг тоннага етказилиши белгиланган. Шунда ҳар бир фермер хўжалиги ҳисобига буғдой етиштириш бўйича гектарлар ҳосилдорлиги 65 центнерга етказилади ва давлат шартнома режасида кўрсатилганидан ортиқча етиштирилган дон хўжаликлар жамоалари моддий манфаатдорлигини таъминлашга сарфланади. Шу ўринда таъкидлаш жоизки, етиштириладиган ҳосилнинг 40 фоизи давлат захираси учун дон корхоналарига топширилади.
Шунингдек, 8887 тонна атрофидаги дон қўшимча шартномаларга асосан тумандаги балиқчилик, парранда ва чорвачилик фермерларига сотилади.
