Каналамизда “Ўқитувчининг қадри бир баклажка пахта ёғи!” сарлавҳаси билан эълон қилинган хабар юзасидан Олот тумани ҳокимлиги матбуот хизмати қуйидагиларни маълум қилади.

Мурожаат Олот тумани ҳокимлиги ва туман халқ таълими бўлими ходимлари томонидан ўрганиб чиқилди. Ўрганиш натижасида Ўзбекистон Республикаси Вазирлар Маҳкамасининг “Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисида”ги қарорига асосан ҳар йили октябр ойининг биринчи ҳафтаси “Кексалар ойлиги” қилиб белгиланган. Мазкур қарор ижросини таъминлаш мақсадида туман Нуронийлар Кенгаши томонидан туманимизнинг барча ҳудудларида тадбирлар ўтказилмоқда. Жумладан, бугун бу каби тадбирлар туманимиздаги “Арабхона”, “Жайҳунобод”, “Хосабўйи”, “Мухтор”, “Қумкашон” ва “Маърифат” маҳаллаларида бўлиб ўтди. Тадбир сўнгида Ёшларни ватанпарварлик руҳида тарбиялашга қўшган улкан ҳиссаси ҳамда жамоат ишларида фаол иштироки учун кексалар ҳафталиги муносабати билан бир гуруҳ меҳнат фахрийларига туман Нуронийлар кенгашининг ташаккурномалари топширилди. Мазкур тадбирда  “Мухтор” маҳалласининг фаол нуронийлари Ориф Воҳидов ва Чори Қурбоновлар пахта йиғим теримида ҳам алоҳида ўрнак кўрсатаётганлиги сабабли илғор теримчиларга ажратилган ўсимлик ёғи ҳам берилган. Кексаларни эъзозлаш, уларга ҳурмат-эҳтиром кўрсатиш — халқимизга хос эзгу фазилат. Ҳурматли ҳамюртлар, кундалик ҳаётимизда юз бераётган янгиланишлар ва ўзгаришларга турлича ёндашувлар билан қараб, турли хил маънода талқин қилиб, аҳоли орасида нотўғри тушунчанинг шаклланланишига сабабчи бўлгунча, юртимиз ривожига ўзингизнинг муносиб ҳиссангизни қўшишингизни сўраймиз!