Конституцияга киритилган ўзгартишларда Ўзбекистон президентининг ваколат муддатини 5 йилдан 7 йилгача узайтириш таклиф қилинмоқда.
Ўзбекистон президентининг ваколат муддати 5 йилдан 7 йилгача узайтирилиши режалаштирилмоқда. Бу 25 июнь куни жамоатчилик муҳокамасига қўйилган «Мамлакат Конституциясига ўзгартишлар киритиш тўғрисида»ги қонун лойиҳасида кўзда тутилган.
Ҳужжатда Конституциянинг 90-моддаси 2-қисмига ўзгартиришлар киритиш, яъни «беш» сўзини «этти» сўзи билан алмаштириш назарда тутилган. 2-қисм қуйидаги таҳрирда баён этилади:
Ўзбекистон Республикаси президенти Ўзбекистон Республикаси фуқаролари томонидан умумий, тенг ва тўғридан-тўғри сайлов ҳуқуқи асосида яширин овоз бериш йўли билан 7 йил муддатга сайланади. Президент сайловини ўтказиш тартиби Ўзбекистон Республикаси қонуни билан белгиланади.
Сенат раисининг биринчи ўринбосари Содиқ Сафаев янги Конституциянинг қабул қилиниши барча фуқароларга, жумладан амалдаги президентга ҳам давлат раҳбари сайловида иштирок этиш имконини беришини таъкидлади. Унинг қўшимча қилишича, Шавкат Мирзиёев «ҳокимиятга ёпишиб олган сиёсатчи эмас».
Охирги марта президентлик муддати 2011 йилда ўзгартирилганди. Кейин муддатлар 7 йилдан 5 йилгача қисқартирилди.
