Президент фармонига мувофиқ, ногиронлиги бўлган шахсларга тиббий-ижтимоий ёрдам кўрсатиш масалалари юзасидан давлат органларига онлайн видеоалоқа тизими орқали мурожаат қилиш платформаси яратилишига оид жараёнлар Коррупцияга қарши курашиш агентлиги томонидан ўрганилди.
Аниқланишича, топшириқ ижросига масъул – Тиббий-ижтимоий хизматларни ривожлантириш агентлиги буюртмачилигида Платформани ишлаб чиқиш бўйича 2022 йил 14 ноябрь куни бошланғич нархи 737 млн сўмлик танлов ўтказилган. Мазкур давлат харидида “Э.” МЧЖ 710 млн сўмлик таклиф билан ғолиб, унга ягона рақиб сифатида иштирок этган “И.” МЧЖ эса захира ғолиби деб топилган.
Ўрганиш жараёнида ушбу икки талабгорнинг ҳужжатлари махсус ахборот порталига бир хил қурилма орқали, бир ИП-манзилдан юкланганлиги аниқланган. Шунингдек, Платформанинг App Сторега жойлаштирилган мобил иловасининг ишлаб чиқарувчиси сифатида “И.У” жамоат бирлашмаси қайд этилган бўлиб, ўрганишларда мазкур бирлашма таъсисчиси Б.С.С. захирадаги ғолиб – “И.” МЧЖнинг ягона раҳбари ва таъсисчиси эканлиги маълум бўлган.
Буюртмачи томонидан мазкур Платформани ишлаб чиқиш учун “Э.” МЧЖга тўлаб берилган 710 млн сўм маблағлар жорий харажатлар сифатида акс эттирилган бўлиб, Платформани балансга қабул қилиш чоралари кўрилмаган.
