Спорт бу – соғлик, спорт бу – ёшлик, у шаҳду-шижоат, баркамоллик ва етуклик демакдир. Мамлакатимизда жисмоний тарбия ва спортни оммалаштириш ижтимоий сиёсатнинг муҳим йўналишларидан бири этиб белгиланган. Чунки спорт аҳоли саломатлигини мустаҳкамлаш, ёш авлодни соғлом ва баркамол этиб тарбиялаш орқали жамиятда соғлом турмуш тарзини қарор топтиради. Турли касалликлар, ёшлар ўртасида зарарли одатларнинг олдини олади. Спорт юксак маданият, ватанпарварлик туйғуларини шакллантиришда ҳам муҳим ўрин тутади. Бу соҳада эришилган ютуқлар мамлакатни дунёга танитади, барчамизга ғурур-ифтихор бағишлайди. Жамиятимизда соғлом турмуш тарзини қарор топтириш давлат сиёсати даражасига кўтарилиб, айни вақтда, мамлакатимизда жисмоний жиҳатдан етук, соғлом авлодни тарбиялаш борасидаги туб ислоҳотлар босқичма-босқич амалга ошириб келинмоқда. Бунинг натижасида спортчиларимиз жаҳон ареналарида юқори натижаларни қўлга киритиб, мамлакатимиз байроғини юксакларга кўтармоқдалар. “Токио – 2020” Олимпия ўйинларида мамлакатимиз жамоаси 200 дан зиёд давлатдан келган энг кучли спортчилар орасида умумжамоа ҳисобида – ўттиз иккинчи, Мустақил Давлатлар Ҳамдўстлигида – иккинчи, Марказий Осиёда эса – биринчи ўринни эгаллади. Бу чиндан ҳам ўзбек спорти тарихидаги улкан натижадир. Паралимпиячиларимиз ҳам юксак матонат ва маҳорат кўрсатиб, XVI Паралимпия ўйинларида 8 та олтин, 5 та кумуш ва 6 та бронза медалига сазовор бўлишди. Умумий ҳисобда мамлакатимиз жамоаси 160 дан зиёд давлатлар ўртасида ўн олтинчи, Осиё қитъаси ҳамда Мустақил давлатлар ҳамдўстлиги давлатлари орасида тўртинчи, Марказий Осиёда эса биринчи ўринни эгаллади. Яна бир эътиборли томони, шу 19 та медалнинг 11 тасини спортчи қизларимиз қўлга киритишди. Бундан кўриниб турибдики, мамлакатимизда хотин-қизлар спортига ҳам катта эътибор қаратилмоқда. Президентимиз Фармонига мувофиқ, барча спортчилар ва уларнинг мураббийлари пул мукофотлари билан тақдирландилар. Фахрий унвон, орденларни шахсан президентдан қабул қилиб олиш мамлакатимизда спортга қаратилган эътиборнинг яққол намоёндасидир.
Рахмонов Рауф Расулович,
Бухоро давлат университети
Факультетлараро жисмоний маданият ва спорт кафедраси доценти
Раҳимбоев Рустам Абдураҳмон ўғли,
Бухоро давлат университети
Жисмоний маданият факультети 2-босқич талабаси
