Жорий йилнинг 10-12 май кунлари яшил макон умуммиллий лойиҳаси доирасида БухДУ ректори Обиджон Хамидов бошчилигида университетнинг бир гуруҳ талаба-ёшлари, профессор-ўқитувчилари, ишчи ходимлари Қорақалпоғистон Республикасининг Мўйноқ туманида «Бухоро давлат университети талаба ёшларининг боғи»ни барпо этиш, шунингдек, Бухоро вилоятига бириктирилган Хўжайли туманида талабаларнинг маданий-маърифий тадбирларини ўтказиш мақсадида ташриф буюришди.
Дастлаб БухДУ жамоаси Қорақалпоғистон Республикасининг Нукус шаҳридаги Бердақ номидаги Қорақалпоқ давлат университетининг фаолиятини яқиндан ўрганиш мақсадида илмий тур доирасида бир қатор учрашувларни ўтказди.
Дастлаб бухоролик делегацияни Қорақалпоқ давлат университети Илмий ишлар ва инновациялар бўйича проректори Изимбет Турдимамбетов ҳамда университет раҳбарияти кутиб олишиб, бош бино фойесида делегация учун қорақалпоқ халқининг миллий маданий меросини ўзида акс этган тадбир ташкил этилди. Ушбу тадбирда университет тарихи, талабалар сони, факультетлар ҳамда йўналишлар бойича БухДУ жамоасига маълумотлар берилди. Қорақалпоқ давлат университети талабаларининг ижоди намуналари кўргазмаси ташкил этилди. Учрашувда Бухоро давлат университети ректори Обиджон Хамидов ҳам сўзга чиқиб университет раҳбариятига миннатдорчилик билдирди ва икки томонлама ҳамкорлик алоқалари янада ривожланиши учун БухДУ доим тайёрлигини таъкидлаб ўтди. БухДУ Илмий ишлар ва инновациялар бўйича проректори Т.Ҳ.Расулов ҳам сўзга чиқиб БухДУ жамоаси Қорақалпоқ давлат университетини ўрганиш мақсадида бир нечта йўналишлар бўйича гуруҳларга ажратилишини айтиб ўтди. Университетни ўрганиш давомида талабалар ҳамда профессор-ўқитувчилар хорижий тиллар, математика, тарих, иқтисодиёт, филология факультетларида талабалар таълим олиши учун яратилган шароитлар, марказлар билан яқиндан танишишди.
Музокаралар давомида келгусида амалга ошириш мумкин бўлган устувор йўналишлар белгилаб олинди. Хусусан, ҳамкорликда лойиҳалар танловида иштирок этиш, янги авлод ўқув адабиётларини яратиш, нуфузли маҳаллий ва халқаро журналларда мақолалар нашр қилиш, ёзги мактабларда талабалар иштирокини таъминлаш, ОТМ талабалар учун фан олимпиадаларни ташкил қилиш келишиб олинди.
Ташриф давомида БухДУ баскетбол жамоаси Қорақалпоқ давлат университети ҳамда Нукус давлат педагогика институти жамоалари билан ўртоқлик учрашувларини ўтказди. Умумий натижаларга кўра Қорақалпоқ давлат университети жамоаси билан учрашувда БухДУ жамоаси 46:39 ҳисоби билан ғалаба қозонди. Ташкил этилган ушбу учрашув ташкилотчилари Қорақалпоқ давлат университети ҳамда Нукус давлат педагогика институти раҳбариятига ўз миннатдорчилигимизни билдирдик.
Тадбирлар давомида БухДУ касаба уюшмаси томонидан талабаларга очиқ дастурхон ҳамда Қорақалпоқ, ўзбек миллий маданий қўшма концерти ташкил этилди. Унда Бухоро давлат университети Санъатшунослик факультети талабалари ҳамда профессор-ўқитувчилари ва Қорақалпоқ давлат университети талабалари ижросида куй-қўшиқлар намойиш этилди.
Қорақалпогистон Республикасига ташрифнинг 2-кунида БухДУ ёшлари Мўйноқ туманида Бухоро давлат университети учун ажратилган экологик ҳудудда «Яшил макон» уммуммиллий лойиҳаси доирасида БухДУ ёшларининг боғи яратилди. Ушбу акцияда 80 нафар талабалар, профессор-ўқитувчилар ҳамда университет раҳбарияти иштирок этишди.
Шунингдек, Мўйноқ туманига ташриф давомида Орол денгизи тарихи музейи, «Кемалар қабристони» Мўйноқ экология музейида бўлдилар. Мўйноқ тумани «Экология музейи»нинг 1980 йилларда доктор Эсеркепов томонидан тўпланган коллекцияси Орол денгизи ва Мўйноқ шаҳрининг тарихини тасвирлайди. Ушбу коллекцияда: миллий либослар, қадимий заргарлик буюмлари, уй-рўзғор буюмлари, қайиқ ва балиқчилик анжом ва аслаҳалари ҳамда тарихий фотосуратлар ўрин олган.
