Кредит қайтарилмаса, “MALIBU” автомашинаси сотилади

Тижорат банклари томондан турли хил шартлар асосида аҳолига кредитлар ажратилиши йўлга қўйилган.
Бироқ, масъулиятсизлик, имкониятларни тўғри баҳоламаслик ва ҳуқуқий билимлар етишмаслиги сабаб тижорат банклари билан тузилган шартнома шартларига риоя қилмаслик ҳолатлари ҳамон учраб турибди.
Шартнома шартлари бузилганлиги боис банк кредит фоиз қарзи ва ажратилган кредитни муддатидан олдин тўлиқ ундириш бўйича судга даъво аризаси киритиши мумкин.
 Гаров мулки асосида олинган кредит қарздорлиги тўлиқ бартараф қилинмаган тақдирда, ундирув гаров мулкига қаратилади.
Шартнома шартларига риоя қилмаслик мижозга қўшимча ҳаражат, ташвиш ва муаммолар олиб келиши мумкин. 
Мисол учун, фуқаролик ишлари бўйича Шайҳонтоҳур туманлараро судининг 14.12.2022 йилдаги ижро ҳужжатига асосан қарздорлар Н.Ризоқулов ва М.Абдурахимовлардан солидар тартибда ундирувчи АТБ “Invest Finance Bank” фойдасига 233.979.075 сўм кредит қарздорлиги ундириш, ундирувни гаровга қўйилган Н.Ризоқуловга тегишли, қора рангли, 2021 йилда ишлаб чиқарилган “MALIBU” русумли автомашинага қаратиш тўғрисидаги ижро ҳужжати Бюронинг Ғиждувон туман бўлими иш юритувига келиб тушган ва ижро ҳаракатларига киришилган.
Ижро ҳаракатлари давомида қарздорларга ижро ҳужжати мазмун моҳияти тўлиқ тушунтирилиб, бартараф этиш учун ихтиёрий муддат берилган бўлсада, ижро ҳужжати талаблари бажарилмаган.
Бўлим давлат ижрочилари томонидан олиб борилган мажбурий ижро ҳаракатлари давомида қарздор Н.Ризоқуловга тегишли бўлган “MALIBU” русумли автомашина тегишли тартибда хатланиб, вақтинчалик сақлаш учун жарима майдончасига жойлаштирилди.
Қарздорлик белгиланган муддат давомида бартараф қилинмаса,   автомашина “E-auksion” электрон савдо майдончаси орқали савдога чиқарилиши ҳақида қарздор расман огоҳлантирилди.
Ҳозирда, мажбурий ижро ҳаракатлари олиб борилмоқда.
Бюронинг Бухоро вилоят бошқармаси