Бухоро давлат педагогика институти ректори, Халқ депутатлари Бухоро шаҳар кенгаши депутати Баҳодир Маъмуровнинг ташаббуси билан шаҳримизнинг кам таъминланган, ижтимоий ҳимояга муҳтож оилалардаги 10 нафар болажоннинг суннат тўйи ўтказилди. Шунингдек, Бухоро давлат педагогика институтида Садриддин Салим Бухорий ва Самад Азимов номидаги ўқув хонаси очилди.
Батафсил:
Мамлакатимизда аҳолининг ижтимоий ҳимояга муҳтож қатламини моддий ва маънавий қўллаб-қувватлаш, жамиятда ўзаро меҳр-оқибат, ҳамжиҳатлик ва хайр-саховат муҳитини янада мустаҳкамлаш борасида кенг кўламли ишлар амалга оширилмоқда. Давлатимиз раҳбарининг “2022 – 2026 йилларга мўлжалланган Янги Ўзбекистоннинг Тараққиёт стратегияси тўғрисида”ги Фармонида таъкидланган “Аҳоли ўртасида ҳуқуқий маданиятни шакллантириш бўйича ҳуқуқий-маърифий тадбирларни халқимизнинг бой тарихи, илмий-маданий мероси, миллий-диний қадриятларни ўргатиш билан уйғун ҳолда ташкил қилиш, ўзбек халқининг миллий қадриятлари ва маънавий меросини асраб-авайлаш, кенг оммалаштириш ҳамда ривожлантиришни давлат томонидан қўллаб-қувватлаш”дан келиб чиқиб, ижтимоий ҳимояга муҳтож оилаларнинг ҳар томонлама қўллаб-қувватланиши “Инсон қадри учун” тамойили асосида олиб борилаётган кенг кўламли ислоҳотларнинг натижасидир.
Бухоро давлат педагогика институти ректори, Халқ депутатлари Бухоро шаҳар кенгаши депутати Баҳодир Маъмуровнинг ташаббуси билан шаҳримизнинг кам таъминланган, ижтимоий ҳимояга муҳтож оилалардаги 10 нафар болажоннинг суннат тўйи ўтказилди. Ўзбек халқининг миллий қадриятлари ва маънавий меросини асраб-авайлаш, кенг оммалаштириш ҳамда ривожлантиришни давлат томонидан қўллаб-қувватлашга қаратилган хайрия суннат тўйида институт жамоаси, нуронийлар, тўй болаларнинг яқинлари иштирок этиб, жажжи ва беғубор болажонларни суннат тўйи билан муборакбод этиб, улар ҳақларига дуо қилди. Сўнг жажжи болажонлар ва уларнинг ота-оналарига тўёна ва совғалар берилди. Бу тўй жажжи ўғлонлар хотирасида яхшилик, меҳр-саховат рамзи сифатида бир умрга муҳрланиб қоладиган бўлди. Шунингдек, Бухоро давлат педагогика институтида Садриддин Салим Бухорий ва Самад Азимов номидаги ўқув хонаси очилди.
