Мамлакатимизда ҳуқуқбузарликлар профилактикаси бўйича комплекс чора-тадбирлар, жумладан, аҳолининг ҳуқуқий онги ва маданиятини юксалтириш, бу борада давлат органлари ва фуқаролик жамияти институтлари ҳамкорлигини такомиллаштириш мақсадида кенг кўламли ислоҳотлар амалга оширилмоқда.
Жорий йилнинг 12 сентябрь куни Ромитан тумани марказида жойлашган “Шердор” тантаналар саройида “Хотин-қизлар ўртасида ҳуқуқбузарлик ва жиноятчиликнинг барвақт олдини олиш ва ишсизликдан ҳоли ҳудудга айлантириш бугунги куннинг долзарб муаммоси” мавзусида йиғилиш бўлиб ўтди.
Йиғилишда таълим ва фан ходимлари касаба уюшмаси Республика кенгаши раиси ўринбосари М.Бабаяров, туман ҳокими У.Барноев, сектор раҳбарлари, туман ҳокими ўринбосарлари, тегишли ташкилот, корхона раҳбарлари, маҳалла бешлиги, отинойилар ва маҳалла фаоллари иштирок этди.
Учрашувда туман ҳокими Умеджон Барноев хотин-қизлар ўртасида жиноятчиликнинг барвақт олдини олиш, туманда хотин-қизлар жиноятчилигига бутунлай барҳам берилган ҳудудга айлантириш, бунинг учун туман соҳа ходимларида билим, имконият, салоҳият етарли эканлиги ҳақида гапирди.
Таълим ва фан ходимлари касаба уюшмаси Республика кенгаши раиси ўринбосари М.Бабаяров хотин-қизлар ўртасида жиноятчиликнинг барвақт олдини олишга янгича ёндошув механизми тўғрисида иштирокчиларга тушунчалар бериб, маҳаллада иш олиб борувчи барча ҳамкор ташкилотларнинг масъуллари, хусусан маҳаллалардаги МФЙ раиси, профилактика инспекторлари, ҳоким ёрдамчиси хотин-қизлар фаоли, ёшлар етакчиси, психолог ҳамда кўча оқсоқолларнинг бирдамликда иш олиб бориши зарурлиги ҳақида сўз юритди.
Тадбир давомида гуруҳларга бўлинган ҳолда хотин-қизлар томонидан содир этиладиган жиноятларнинг олдини олиш, жазони ижро этиш муассасаларидан озод этилган ҳамда нотинч хотин-қизларнинг муаммоларини ҳал этиш чораларини кўриш, жиноят қилишга мойиллиги бўлган хотин-қизлар билан тизимли ишлаш мавзулари муҳокама қилинди.
Ўзаро фикрлар асосида мавжуд муаммолар ва уларнинг ечими юзасидан таклиф ва тавсиялар берилди.
