Аниқлик киритилишича, 1995, 1996 ҳамда 1999 йил туғилган судланувчилар бир гуруҳ бўлиб белгиланган тартибда ҳуқуқни бузиб, чет элга чиқиб, терроризм билан боғлиқ жиноятларни содир этган.
Иш ҳужжатларида айтилишича, судланувчилар қўл бола усулда ясалувчи портловчи ускуна ва моддаларни ясашни ўрганиш мақсадида уюшган гуруҳга бирлашган. Шунингдек, улар халқаро террористик ташкилотнинг ғояларини қўллаб-қувватлаб келган.
Жиноят ишлари бўйича Юнусобод туман судида диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш; қонунга хилоф равишда чет элга чиқиш ёки Ўзбекистонга кириш; террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш; Ўзбекистоннинг конститусиявий тузумига тажовуз қилиш; жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш; терроризмни молиялаштириш; ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш жиноятларини содир этганликда айбли деб топилган шахсларга оид жиноят иши кўриб чиқилди.
Судланувчилар нима сабабдан бу ишни қилганига қуйидагича изоҳ берди:
«Интернет тармоғи орқали тақиқланган диний марузаларни эшитиб, Сурияга кетиш истаги туғилди. 2019 йил апрель ойида Сурияга бордик. У ерда халқаро террористик ташкилот бўлмиш »Тавоҳид жиҳод«га аъзо бўлдим. Бизни улар босим остида ушлаб турди, электрошокерлар ҳам ишлатишди. Қилган ишларимда афсусдаман».
Суд ҳукмига кўра, 3 нафар судланувчилар Жиноят кодексининг 59-моддаси билан 15 йилга озодликдан маҳрум қилинди.
