Бухоро давлат педагогика институти (БухДПИ) ва Қирғизистон Республикаси талабалар ассоциацияси ўртасида самарали ҳамкорлик алоқалари йўлга қўйилди. Онлайн суҳбатда икки томоннинг вакиллари ўзаро ҳамкорликни янада ривожлантиришга доир муҳим фикрларни ўртоқлашдилар. Учрашувда БухДПИ магистранти, Олий Мажлис Қонунчилик палатаси ҳузуридаги Ёшлар парламенти аъзоси Р.Раҳимбоев, БухДПИ Ёшлар иттифоқи бошланғич ташкилоти етакчиси З.Шерназаров, Қирғизистон Республикаси талабалар ассоциацияси президенти Б.Кидиев ва вице-президенти Б.Курманбековлар иштирок этишди.
Ҳамкорликнинг асосий мақсади – иқтидорли ва ташаббускор талабаларни замонавий илм-фан соҳасига жалб этиш, волонтёрлик ҳаракатини кенгайтириш, ёшларда етакчилик ва креатив фикрлаш қобилиятини ривожлантиришдан иборат. Шунингдек, турли лойиҳалар ташкил этиш, ёшларнинг лидерлик салоҳиятини ошириш мақсад қилиб қўйилган.
Ушбу ҳамкорлик юртларимиз ўртасида дўстлик, билим ва тажриба алмашинуви йўлида муҳим қадам бўлади.
