«Газпром» раҳбари Миллер Россия президенти Путин билан учрашувда Ўзбекистонга максимал ҳажмда газ етказиб берилаётганини маълум қилди.
«Декабрда Ўзбекистонга совуқ ҳаво кириб келди, ўзбекистонлик дўстларимиз ва ҳамкасбларимиз газ етказиб беришни имзоланган шартнома бўйича кунлик мажбуриятларимиздан икки баравар кўпроқ ҳажмда оширишни сўради. Ҳозирда Ўзбекистонга «Марказий Осиё – Марказ» қувури орқали берилиши мумкин бўлган максимал техник ҳажмдаги газни етказиб беряпмиз», — деган Миллер.
Унинг сўзларига кўра, «Газпром» Ўзбекистонга газ етказиб бериш бўйича сўровларни тўлиқ қондиряпти.
Ўзбекистон Россиядан газ импорти ҳажмини оширган бир пайтда Хитойга экспорт ҳажмини кўпайтирган. Масалан, ноябрь ойида Ўзбекистон Хитойга 54,59 млн долларлик газ сотди. Йил бошидан буён экспорт ҳажми 509,03 млн долларни ташкил этди. Ўтган йилги эскпорт кўрсаткичи бундан икки баравар кам бўлган эди.
