Республика шошилинч тиббий ёрдам илмий маркази Бухоро филиали раҳбарияти ташаббуси билан директор бошчилигида бир гуруҳ филиал масъул ходимлари янги 2023 йил кириб келишига саноқли соатлар қолганида филиалнинг болалар даволанаётган барча бўлимларига келиб, у ерда бўлган келажагимиз эгаларини байрам билан қутладилар.
Табрик давомида уларга энг эзгу ва самимий тилаклар билдирилди. Тадбир қатнашчилари бўлган болалар томонидан ташриф буюрган меҳмонлар учун янги йил, қорбобо, қорқиз ва қиш фаслига аталган қўшиқлар, куй рақслар намойиш қилиниб, жўшқин шеърлар айтиб берилди. Филиал ходимлари ҳам беихтиёр болалар сафига қўшилиб, ўйин-кулгу рақсларда иштирок этдилар.
Шундай шодиёнали кунда оиласи бағридан олисда бўлган болажонлар бундай эътибор ва ғамхўрликдан хурсанд бўлдилар. Болаларга қувонч улашган Қорбобога ва ушбу хайрли тадбир ташаббускорларига беморларнинг яқинлари миннатдорчилик билдирдилар.
