Хотира ва қадрлаш куни байрами арафасида вилоят ҳокими, ҳарбий-маъмурий сектор раҳбари Ботир Зарипов бошчилигидаги мутасаддилар, ҳуқуқни муҳофаза қилиш идоралари, жамоатчилик вакиллари шаҳар ва туманларда истиқомат қилаётган Иккинчи жаҳон уруши қатнашчилари ҳолидан хабар олиб, давлатимиз раҳбарининг табриги ва пул мукофотларини етказишмоқда.
Шу жиҳатдан бугун эрта тонгдан Олот тумани “Ёш ботир” маҳалласида яшовчи Ҳожимурот ота Бектошевнинг қалби чексиз қувончга тўлди. Унинг шинамгина ҳовлиси тумандошлари, маҳалладошлари, фарзандлари ва неваралари билан гавжум бўлди.
Учрашувда Ботир Зарипов Президентимизнинг Иккинчи жаҳон урушида қозонилган ғалабанинг 79 йиллиги ҳамда Хотира ва қадрлаш куни муносабати билан йўллаган байрам табригини ўқиб эшиттирди. 20 миллион сўм миқдоридаги пул мукофоти ва байрам совғаларини топширди. Президентимиз номидан тақдим этилган махсус қимматбаҳо совға эса уруш фахрийларига бўлган чексиз ҳурмат рамзи бўлди.
Шунингдек, отахон вилоят ҳокимлиги, “Нуроний” жамғармаси томонидан ҳам моддий рағбатлантирилди. Бундан ташқари, уруш фахрийсига вилоят мудофаа ишлари бошқармаси ва бошқа ташкилотлар томонидан ҳам эҳтиром кўрсатилди.
Бугун вилоятимизда истиқомат қилаётган 7 нафар иккинчи жаҳон уруши қатнашчисига ана шундай эҳтиром кўрсатиш белгиланган.
Бугунги дориломон кунларга етишимизда юртимизнинг содиқ фарзанди сифатида баҳолиқудрат ҳисса қўшганлардан яна бири Файзулло бобо Ҳожиев ҳам нафақат ўзи истиқомат қилаётган Арабхона қишлоғида, балки вилоят, қолаверса, мамлакатимизнинг табаррук ёшдаги отахонларидан.
Вилоят раҳбари ва маъмурий секторлар масъуллари, жамоатчилик вакиллари Файзулло бобо Ҳожиев хонадонида бўлиб, табаррук 102 ёшни қаршилаётган отахон ҳолидан хабар олдилар. Файзулло отага мамлакатимиз Президентининг самимимй сўзлари битилган табриги ўқиб эшиттирилиб, 20 миллион сўм миқдоридаги пул мукофоти, эсдалик совғалари улашилди. Шунингдек, отахон вилоят ҳокимлиги, тегишли ташкилотлар томонидан ҳам алоҳида рағбатлантирилди.
