Бугун Бухоро вилояти солиқ бошқармасида оммавий ахборот воситалари ходимлари иштирокида матбуот анжумани бўлиб ўтди.
Унда 20 дан ортиқ журналист ва блогерлар қатнашди.
Тадбирда йиғилганларга вилоят солиқ бошқармаси бошлиғи Д.Юлдашев жорий йилнинг ИИ-чораги давомида вилоят солиқ хизмати органлари томонидан амалга оширилган ишлар, эришилган натижалар ҳамда келгусидаги устувор вазифалар ҳақида ахборот берди.
Хусусан, «Маҳалла еттилиги»га киритилган солиқ хизмати органи ходимларининг асосий вазифалари ва амалга оширилаётган чора-тадбирлар натижасида ҳудудларда тадбиркорлар ўртасида соғлом рақобат муҳити шакллантирилаётгани, пировардида буджет тушумлари барқарорлигига эришилаётгани аниқ мисоллар билан таъкидлаб ўтилди.
Очиқ мулоқот ва самимий руҳда ўтган матбуот анжуманида журналистлар ва блогерлар мавзу юзасидан ўзларини қизиқтирган саволларга тўғридан-тўғри жавоб олдилар.
Тадбирда вилоят солиқ хизмати органлари фаолиятига бағишланган видео-лавҳалар ҳам намойиш этилди.
Анжуманда Ўзбекистон Журналистлар уюшмасининг вилоят бўлими бошлиғи вазифасини бажарувчи Ш.Очилов ҳам иштирок этиб, вилоят солиқ бошқармаси Жамоатчилик билан алоқалар шўбаси бошлиғи Б.Файзиевнинг Ўзбекистон журналистлари ижодий уюшмаси аъзолигига қабул қилинганлигини эълон қилиб, бошқарма раҳбарияти иштирокида унга уюшманинг рамзий кўкрак нишони ва гувоҳномасини топширди.
Матбуот анжумани якунида солиқ маъмурчилиги, хусусан вилоятимизда солиқ хизмати органлари ходимларининг фаолиятларини ёритиш орқали аҳоли орасида солиқ маданиятини шакллантиришда қўшган ҳиссаси учун бир гуруҳ журналист ва блогерларга 27 июнь – Матбуот ва оммавий ахборот воситалари ходимлари куни муносабати билан ташаккурнома ва эсдалик совғалари топширилди.
